"Trampa qədər olan dövlətlər Rusiyanın gələcək addımlarına hazırlaşırdılar"- Politoloq

“Preskovun fikirlərində İranı müdafiə etməsi və İranın nüvə proqramının sülh yolu ilə həllinə dair çağırışı, məncə, Tehran və Kreml arasında mövcud olan müttəfiqlik münasibətləri ilə bağlıdır. Həmçinin unutmamalıyıq ki, Trampın inauqurasiyasına cəmi bir neçə gün qalmış, regionumuzda strateji tərəfdaşlıqla bağlı bir sıra güclü bəyannamələr imzalandı."

Politoloq İlyas Hüseynov bu sözləri News365.az-a deyib. 

"Bu sənədlər Rusiya, İran, eləcə də bir qədər öncə Ukrayna və Böyük Britaniya ilə imzalanmışdı. Yəni sanki Trampa qədər olan dövlətlər Rusiyanın gələcək addımlarına hazırlaşırdılar.

İran-Rusiya arasında strateji tərəfdaşlıq haqqında sənədin imzalanması isə müəyyən müddət təxirə salınsa da, nəhayət sürətlə razılaşdırıldı. Nümayəndə heyətləri bəzi mövqelərdə razılığa gəldi və bu, Şimal-Cənub nəqliyyat dəhlizi vasitəsilə bizim regionumuza da təsir göstərməyə başladı.

Maraqlı məqamlardan biri də odur ki, son dövrlər ABŞ ilə İran arasında gərginlik əhəmiyyətli dərəcədə artıb. Ekspertlər bildirirlər ki, Tramp Rus-Ukrayna müharibəsini iki əsas səbəbə görə bitirmək istəyir: birincisi, o, Respublikaçı elektorata vəd verib və bu vədini yerinə yetirməlidir. Ən azından, yaxın zamanda atəşkəsin elan olunması Trampın siyasi imicinə müsbət təsir edə bilər. İkincisi isə təxirə salınmış hansısa plan mövcuddur və həmin planın icrasına dərhal başlanılmalıdır.”- deyə politoloq vurğulayıb.