Azərbaycan futbolunda ağır məğlubiyyət: U-17 millisi 16 qol buraxdı
Azərbaycanın 17 yaşadək qızlardan ibarət milli komandası Avropa çempionatının seçmə mərhələsində biabırçı nəticə ilə üzləşib.
News365.az xəbər verir ki, B Liqasının B1 qrupunda mübarizə aparan Azərbaycan millisi ilk oyununda İrlandiya ilə qarşılaşıb və meydanı 0:16 hesablı məğlubiyyətlə tərk edib.
Albaniyanın Rroqojina şəhərində keçirilən qarşılaşmada komandamız rəqib qapısına yol tapa bilməyib. Əvəzində ilk hissədə 9, ikinci hissədə isə daha 7 qol buraxıb.
16 top buraxmaq artıq sadəcə bir məğlubiyyət deyil, Azərbaycan qadın futbolunun aşağı yaş qruplarında ciddi suallar doğuran nəticədir.
Burada əsas məsələ yeniyetmə futbolçuları günahlandırmaq yox, bu nəticənin necə yarandığını soruşmaqdır.
17 yaşlı futbolçudan Avropanın aparıcı futbol ölkələrindən birinin U-17 komandası qarşısında möcüzə gözləmək olmaz. Amma 90 dəqiqədə 16 qol buraxılması hazırlıq səviyyəsi, taktiki plan, fiziki hazırlıq, müdafiə sistemi və ümumilikdə qız futbolunun inkişaf strategiyası barədə ciddi düşünməyə əsas verir.
Üstəlik, AFFA-nın məlumatına görə, komanda bu oyunlara hazırlıq məqsədilə sentyabrın 21-dən 25-dək Gəncədə təlim-məşq toplanışı keçirib və daha sonra Albaniyaya yollanıb.
Deməli, söhbət tamamilə hazırlıqsız meydana çıxan komandadan getmir. Buna görə də 0:16 hesabının səbəbləri barədə AFFA və məşqçi heyətinin açıqlaması xüsusilə vacibdir.
Bu məğlubiyyətin ən narahatedici tərəfi isə hesabın özündən daha çox, Azərbaycanla Avropa futbolunun aşağı yaş qrupları arasındakı fərqin bu qədər kəskin görünməsidir.
Qadın futbolunun inkişafından danışırıqsa, belə nəticələrdən sonra yalnız “komanda uduzdu” deməklə kifayətlənmək olmaz. Hansı işlər görülür? Uşaqlar neçə yaşından sistemli məşq edir? Regionlarda qız futboluna nə qədər diqqət ayrılır? U-17 səviyyəsində beynəlxalq rəqabətə hazırlıq necə aparılır? Və ən əsası, bu komandanın inkişaf perspektivi varmı?
Azərbaycan U-17 millisi turnirdə hələ iki oyun keçirəcək. Komanda oktyabrın 1-də Kosovo, oktyabrın 4-də isə Albaniya ilə qarşılaşacaq.
0:16-dan sonra əsas sual artıq “niyə uduzduq?” deyil. Əsas sual budur: bu nəticənin təkrarlanmaması üçün nə dəyişəcək?
