Lənkəranda gənclər üçün sahibkarlıq və biznes bacarıqlarının inkişafına dair təlim keçirilib -FOTOLAR

10 noyabr 2026-cı il tarixində Lənkəran Heydər Əliyev Mərkəzində Azərbaycan Respublikasının Gənclər Fondunun maliyyə dəstəyi ilə “Üfüq” Gənclərin İnkişafı Naminə İctimai Birliyi tərəfindən həyata keçirilən “Gənc Sahibkarların İnkişaf Proqramı” layihəsi çərçivəsində maarifləndirici təlim təşkil olunub.

Tədbirdə Lənkəran rayonundan 60 nəfər gənc iştirak edib.

Tədbirin açılışında layihə rəhbəri Həzrət Bədiyev çıxış edərək bildirib ki, region gənclərinin sahibkarlıq sahəsində bilik və bacarıqlarının artırılması, onların iqtisadi fəallığının dəstəklənməsi müasir dövrün əsas çağırışlarından biridir. Onun sözlərinə görə, gənclərin öz biznes ideyalarını formalaşdırması və bu ideyaları reallaşdırmaq üçün zəruri biliklərə yiyələnməsi onların gələcək məşğulluq imkanlarının genişlənməsinə də müsbət təsir göstərə bilər. H.Bədiyev layihənin Lənkəran və Masallı rayonlarında həyata keçirilməsinin region gəncləri üçün yeni imkanlar yaradacağını vurğulayıb.

Təlimçi Orxan Məmmədov iştirakçılara sahibkarlıq fəaliyyətinin əsas prinsipləri, biznes ideyasının formalaşdırılması, biznes planın hazırlanması və ilkin sahibkarlıq addımlarının atılması barədə ətraflı məlumat verib.

Təlim zamanı gənclərin biznes düşüncəsinin formalaşdırılması, mövcud imkanların düzgün qiymətləndirilməsi və fərdi təşəbbüslərin real biznes fəaliyyətinə çevrilməsi məsələlərinə xüsusi diqqət yetirilib. İştirakçılar müxtəlif praktiki nümunələr əsasında biznes ideyalarının inkişaf etdirilməsi və sahibkarlıq fəaliyyətində qarşıya çıxa biləcək çətinliklərin aradan qaldırılması yolları ilə tanış olublar.

İnteraktiv formada keçirilən təlimdə gəncləri maraqlandıran suallar cavablandırılıb, onların sahibkarlıq sahəsindəki fikir və təşəbbüsləri ətrafında müzakirələr aparılıb.

Qeyd edək ki, “Gənc Sahibkarların İnkişaf Proqramı” layihəsinin əsas məqsədi Lənkəran və Masallı rayonlarında yaşayan gənclərin sahibkarlıq biliklərini artırmaq, innovativ biznes ideyalarını dəstəkləmək və onların iqtisadi fəallığının yüksəldilməsinə töhfə verməkdir.