Nasistlər Eynşteynin kitablarını yandırdı, alim Almaniyanı tərk etdi

Elm tarixinin ən böyük dühalarından biri olan Albert Eynşteynin həyatı yalnız elmi kəşflərlə deyil, həm də yaşadığı dövrün siyasi təqibləri ilə yadda qalıb. Bir vaxtlar Berlindəki evində kitab rəflərinin qarşısında şəkil çəkdirən alim cəmi 13 il sonra nasist rejiminin hədəfinə çevrilərək Almaniyanı tərk etməli olub.

News365.az xəbər verir ki, bu barədə təhsil eksperti Etibar Əliyev sosial şəbəkə hesabında paylaşım edib.

Ekspert paylaşımında 1920-ci ildə Berlindəki evində, kitab rəflərinin qarşısında çəkilmiş Eynşteynin fotosunu xatırladıb. O qeyd edib ki, 1933-cü ildə Almaniyada nasistlərin hakimiyyətə gəlməsindən sonra alim ölkəni tərk etməyə məcbur olub. Həmin dövrdə onun elmi irsinə və şəxsi kitabxanasına da ciddi zərbə vurulub.

Qeyd edək ki, yəhudi əsilli Albert Eynşteyn nasistlərin hakimiyyətə gəlişindən sonra Almaniyaya qayıtmayıb. ABŞ-də yaşamağa başlayan alim 1940-cı ildə bu ölkənin vətəndaşlığını qəbul edib.

Nasist rejimi dövründə yəhudi alimlərin və mütəfəkkirlərin əsərləri də təqib olunub. 1933-cü il mayın 10-da Almaniyanın bir sıra şəhərlərində nasist tələbə təşkilatlarının təşəbbüsü ilə kütləvi kitab yandırma aksiyaları keçirilib. Eynşteynin elmi və siyasi baxışları da nasist ideologiyasının hədəfinə çevrilib.

Ekspertin paylaşımındakı diqqətçəkən məqam isə tarixin acı ironiyasıdır: kainatın qanunlarını izah edən nisbilik nəzəriyyəsinin müəllifi öz ölkəsində dözümsüzlük və siyasi təqiblə üzləşib. Elmin sərhəd tanımadığı bir dünyada alim öz vətənini tərk etməyə məcbur qalıb.

News365.az