Yalnız güclü dövlət bağışlamağı bacarır- Amnistiya aktı nələri özündə ehtiva edir?

Xəbər verdiyimiz kimi Azərbaycan Prezidenti İlham Əliyev  "Konstitusiya və Suverenlik İli" münasibətilə amnistiya elan olunması təşəbbüsünü irəli sürüb.

Və amnistiya aktı müzakirə və qəbul üçün Milli Məclisə göndərilib. Dekabrın 16-da və 17-də Milli Məclisin komitələrində amnistiya aktı müzakirə edildikdən sonra plenar iclasa tövsiyyə olunub.

Qeyd edək ki, amnistiya aktının ümumilikdə 20 mindən çox şəxsə şamil ediləcəyi gözlənilir. Bunlardan 5 mindən çox məhkumun azadlıqdan məhrumetmə cəzasından azad ediləcəyi, 3 mindən artıq şəxsin cəzasının azaldılacağı, 7 mindən çox məhkumun azadlığın məhdudlaşdırılması cəzasından, 4 minə yaxın məhkumun azadlıqdan məhrumetmə ilə bağlı olmayan digər cəzalardan və ya şərti tətbiq edilmiş cəzalardan, habelə mindən çox şəxsin cinayət məsuliyyətindən azad ediləcəyi proqnozlaşdırılır.
Amnistiya aktının layihəsinə əsasən, Azərbaycan Respublikasının suverenliyinin və ərazi bütövlüyünün qorunması uğrunda aparılan döyüş əməliyyatlarında, o cümlədən Vətən müharibəsində və 2023-cü il sentyabrın 19-20-də keçirilmiş antiterror əməliyyatında iştirak etmiş şəxslərin, eləcə də bu əməliyyatlarda həlak olmuş və ya xəbərsiz itkin düşmüş şəxslərin yaxın qohumlarının, Ermənistan Respublikasının mülki əhaliyə qarşı hərbi təxribatı nəticəsində əlil olmuş şəxslərin, habelə qadınların, 60 yaşına çatmış şəxslərin, cinayət törədərkən yetkinlik yaşına çatmayanların və digər şəxslərin cəzadan və ya cinayət məsuliyyətindən azad edilmələri nəzərdə tutulur.

Bununla yanaşı, layihəyə əsasən, böyük ictimai təhlükə doğurmayan və ya az ağır cinayət, habelə ehtiyatsızlıqdan cinayət törətdiklərinə görə azadlıqdan məhrumetmə cəzasına məhkum olunmuş bir sıra şəxslər cəzadan azad ediləcək və ya cəzalarının çəkilməmiş hissəsi azaldılacaq.

Amnistiya aktı 20 mindən artıq məhkumu əhadə edəcək. Bu da o deməkdir ki, onminlərlə insan bu aktın sevincini dadacaq. Maraqlıdır ki, bu dəfəki Amnistiya aktı 16 kateqoriya məhkumlara şamil ediləcək. Onların arasında 44 günlük müharibənin, antiterror əməliyyatlarının iştirakçıları, hətta onların yaxın qohumları da var.

Maraqlıdır ki, ağır və xüsusilə ağır cinayətlərə görə məhkum olunanlar istisna olmaqla, təyin edilmiş cəzanın müddətindən asılı olmayaraq qadınlar azadlıqdan məhrum etmə cəzasından azad ediləcəklər. Bundan başqa 18 yaşına çatmamış şəxslərə amnistiya tətbiq olunacaq. Layihəyə əsasən, ağır və xüsusilə ağır cinayətlərə görə məhkum olunlar istisna olmaqla təyin edilmiş cəzanın müddətindən asılı olmayaraq 18 yaşına çatmamış şəxslər azadlıqdan məhrum etmə cəzasından azad ediləcəklər.

“Konsitusiya və Suverenlik ili” münasibəti ilə amnistiya aktının verilməsi əslində gözlənilirdi. Çünki Cənab Prezidentin həmişə humanist addımları olub. Əfv fərmanları verməklə hər il yüzlərlə ailəni sevindirib, yüzlərlə insana sağlam həyata qayıtmaq üçün ikinci bir şans verib. Bu il də ənənə pozulmadı. Və növbəti dəfə  amnistiya ilə bağlı qanun layihəsi Milli Məclisə göndərildi.

Nəzərə alaq ki, bu dəfəki amnistiya aktının miqyası çox genişdir. Eyni zamanda məhkumların kateqoriyası da artırılıb.

Belə ki, ağır cinayətlər törədənlər və Vətənə xəyanət edənlər istisna olmaqla minlərlə məhkum bu humanist addımdan yararlanacaq.

Ona görə də Ölkə başçısının bu humanist addımını hər kəs yüksək qiymətləndirir və alqışlayır. Bu humanist addım ilk növbədə dövlətin gücünü göstərir. Çünki güclü dövlətlər bağışlamağı bacarır. 
Məhz  bu amnistiya aktı ilə Prezident İlham Əliyev sübut etdi ki, dövlət gücünü cəzada yox, mərhəmətdə görür. Eyni zamanda cəmiyyətə də bir mesaj verilir ki, dövlət cinayət etmiş şəxslərə yenidən normal həyata qayıda bilmələri üçün ikinci şans tanıyır ki, o adamlar gələcəkdə dövlət və xalqın xeyri naminə çalışsınlar.

Bir sözlə, Prezident İlham Əliyev növbəti dəfə Azərbaycan dövlətinin nə qədər humanist prinsiplər üzərində qurulduğunu və inkişaf etdiyini göstərdi. Bu addım ümumxalq sevincinə səbəb olmaqla yanaşı Beynəlxalq miqyasda da təqdir edildi.

Ən əsası Azərbaycan lideri Dünya Azərbaycanlılarının Həmrəylik Günü və Yeni il münasibəti ilə xalqa ən gözəl hədiyyəsini etdi.

News365.az