Vətəndaşın sosial müdafiəsi iqtisadi inkişafın gücüdür- TƏHLİL

Sosial islahatların həyata keçirilməsi bütün ölkələrdə çətin və məsuliyyətli iş hesab edilir. İqtisadi cəhətdən güclənən Azərbaycanda da insanların soaial-iqtisadi müdafiəsi daim nəzarətdə saxlanır, rifah halı yüksəlir. Dövlət başçısı İlham Əliyevin sosial siyasətinin mərkəzində vətəndaş rifahının təminatı prinsipi dayanır. Əsas məqsəd vətəndaşların sosial durumunun yüksəldilməsi, aztəminatlı və həssas qruplara aid insanların maddi vəziyyətinin yaxşılaşdırılmasına hesablanıb. Azərbaycanın sosial sahəyə çox böyük diqqət göstərən ölkə olduğunu dəfələrlə çıxışlarında qeyd edən Prezident İlham Əliyev demişdir:”Biz ölkəmizdə bazar iqtisadiyyatı prinsiplərini sosial ədalət prinsipləri ilə birləşdirə bildik və hesab edirəm ki, Azərbaycanın uğurlu inkişafı məhz buna söykənir". Elə bunların nəticəsidir ki, Azərbaycan hazırda dünya miqyasında güclü iqtisadiyyata, orduya və sosial siyasətə malik olan bir ölkədir. Onun əsas təməl sütunlarını təşkil edən sahələrdən biri isə əlbəttə ki, düzgün aparılan sosial-iqtisadi inkişafdır. Dövlətin sosial siyasətinin mərkəzində isə Azərbaycan vətəndaşı, onun rifahı, yaşayışının, sosial müdafiəsinin gücləndirilməsi məsələsi dayanır.

Əsası ümummilli lider Heydər Əliyev tərəfindən qoyulan və bu gün də dövlət başçısı İlham Əliyev tərəfindən layiqincə davam etdirilən sosialyönümlü siyasət öz yüksək inkişaf mərhələsini yaşayır. Artıq Azərbaycan bu sahədə bir çox ölkələrə layiqli nümunədir. Dövlət başçısının növbəti Sərəncamı ilə sonuncu-beşinci sosial islahatlar paketi vətəndaş cəmiyyətinin rifah halının daha da yaxşılaşdırılması istiqamətində atılan mühüm addımdır. Bu, insanların rahat yaşaması ilə yanaşı, dövlətin vətəndaşına verdiyi dəyər və diqqətin təzahürüdür. Baxmayaraq ki, cəmi beş il qabaq müharibə şəraitində yaşamış ölkə olmuşuq, böyük bir ərazimiz düşmən tərəfindən tamamilə dağıdılıb, yenə də Azərbaycan iqtisadi gücü və daxili potensialı sayəsində əhalinin sosial rifah halının yaxşılaşdırılması istiqamətində dayanmadan islahatlar aparır. Düşünülmüş düzgün sosial-iqtisadi siyasət sayəsində biz hər gün daha da güclənirik. Bütün dünyada iqtisadi böhran yaşandığı bir zamanda Azərbaycan işğaldan azad etdiyi torpaqlarda geniş quruculuq və tikinti-bərpa işləri aparmaqla yanaşı, həm də sosial layihələri də ardıcıl və yüksələn xətlə davam etdirir.

Prezident İlham Əliyevin sosial islahat sahəsində apardığı uğurlu siyasətin mərkəzində duran əsas məsələlərdən biri də əhalinin həssas qruplarının, xüsusilə şəhid ailələri və müharibə əlillərinin sosial müdafiəsinin gücləndirilməsidir. Elə bunun nəticəsidir ki, son illərdə sosial müdafiə sistemində ardıcıl və dərin islahatlar aparılır. 2018-2025-ci illər ərzində həyata keçirilən 5 böyük sosial islahat paketi 4 milyon vətəndaşı əhatə edib və həmin ayrılan illik əlavə vəsait 7 milyard 600 milyon manat təşkil edib. Ötən müddət ərzində minimum əməkhaqqı 3,1, minimum pensiya 2,9, orta aylıq əməkhaqqı 2, orta aylıq pensiya 2,6 dəfə artıb. Dövlət sosial müavinət və təqaüd ödənişləri isə 5 dəfə artaraq 1,9 milyard manata yüksəlib. Ünvanlı sosial yardımın orta məbləği 2,5 dəfə, yaşayış minimumu 65 faiz, ehtiyac meyarı isə 2,2 dəfə artırılıb. Qeyd edilən illərdə əmək müqavilələrinin sayı isə 41 faiz artaraq 1 milyon 851 minə çatıb. Ölkə üzrə əməkhaqqı fondu isə 3,2 dəfə artıb. Ələlxüsus, postmüharibə dövründə şəhid ailələrinin və müharibə əlillərinin sosial müdafiəsi diqqət mərkəzində saxlanılaraq, 132 min unikal şəxsə 400 mindən çox xidmət göstərilib. Bu kateqoriyadan olan şəxslər üçün nəzərdə tutulan müavinət və təqaüdlər orta hesabla 2 dəfədən çox artırılıb. Şəhid ailələri, müharibə əlilləri və həssas təbəqədən olan digər şəxslərə 6 min 800 mənzil verilib, 28 min nəfər məşğulluq tədbirlərlə cəlb edilib, 11 min nəfərə 89 min sosial-psixoloji dəstək və reabilitasiya xidmətləri göstərilib.

Bu baxımdan Azərbaycan yeritdiyi sosialyönümlü siyasəti ilə seçilir. Həyata keçirilən strateji kursun əsas məqsədi vətəndaşların bilavasitə rifahını təmin etmək, onun sosial problemlərinin həllini ön plana çıxarmaqdır. Dövlət başçısının da qeyd etdiyi kimi “Bizim siyasətimizin mərkəzində Azərbaycan vətəndaşı, onun ehtiyacları, rifahı və təhlükəsizliyi dayanır" deyiminin kökünü həyata keçirilən genişmiqyaslı sosial islahatların mahiyyəti və məqsədi təşkil edir. Sözügedən sosial proqramlar və verilən mühüm qərarlar Azərbaycan vətəndaşının yaşayış səviyyəsinin yaxşılaşdırılması, sosial müdafiəsinin gücləndirilməsi istiqamətində uğurlu nəticələr verməkdədir. Sosial məsələlərin həlli yalnız iqtisadi göstəricilərlə bağlı deyil, həmçinin, dövlət siyasətinin əsas prioritetlərindən biridir. Bu, eyni zamanda, ölkə iqtisadiyyatının yüksək inkişaf mərhələsindən xəbər verir. Əlbəttə ki, ölkədə sosial-iqtisadi imkanlar artıqca insanların həyat şəraitinin yaxşılaşdırılması istiqamətində aparılan məqsədyönlü islahatlar da uğurla nəticələnir. Belə ardıcıl və məqsədyönlü siyasətin məntiqi nəticəsi olaraq ölkəmiz BMT tərəfindən bəyan olunan “Dayanıqlı İnkişaf Məqsədləri”nin icrasında, o cümlədən də yoxsulluğun azaldılması istiqamətində diqqətəlayiq nəticələr qazanıb.

Azərbaycan dövləti hər zaman əhalinin sosial baxımdan aztəminatlı təbəqəsini diqqət mərkəzində saxlayıb. Yoxsulluğun həll edilməsi istiqamətində vətəndaşlara ünvanlı dövlət sosial yardımı paketinin ayrılması mühüm addımlardan biridir.

Həyata keçirilən güclü iqtisadi və sosial siyasət Azərbaycanda dövlət siyasətinin əsas istiqamətlərindən biridir. Sosial sahədə uğurlar, xalqın ildən-ilə yüksələn rifahı dövlətimizin başçısının uzaqgörən siyasətinin əyani sübutudur. Dünyanın bir çox ölkələrində əhalinin sayı azalmağa doğru getdiyi halda, Azərbaycanda əhalinin sayında artım müşahidə olunur. Baxmayaraq ki, beş il əvvəl xalqımız müharibə şəraitində yaşamış və möhtəşəm qələbə qazanmışdır. Sözsüz ki, əldə edilən Zəfərdə itkilərimiz də olmuşdur. Lakin bu qələbə bizə güclü, möhkəm sosial, iqtisadi dövlətə çevrilməyimizdə əsas amillərdən biri olmuşdur. Bu gün Azərbaycan qüdrətli, güclü bir dövlətdir. Aparılan sosial-iqtisadi inkişaf strategiyası nəticəsində bütün sahələrdə mühüm tarixi nailiyyətlərə imza atan, iqtisadi qüdrətini artıran, stabillik, əmin-amanlıq məkanı olan ölkəmizdə sosial rifah səviyyəsinin də davamlı şəkildə yaxşılaşması özünü açıq şəkildə göstərir.