“Qanunsuz davranışlara qarşı daha sərt tədbirlər görülməlidir” - Elçin Lənbəranski

Son dövrlər sosial şəbəkələrdə və müxtəlif platformalarda yayılan bəzi davranışlar cəmiyyətdə ciddi narahatlıq doğurur. İctimai qaydalara zidd hərəkətlər, qanunsuz fəaliyyətlər və onların təkrar hallanması ilə bağlı müzakirələr getdikcə daha da aktuallaşır.  Məsələ ilə bağlı ictimai fəallar da öz narahatlıqlarını ifadə edərək hüquq-mühafizə orqanlarının rolunun gücləndirilməsinin vacibliyini vurğulayırlar. 

 News365.az  xəbər verir ki, İctimai fəal Elçin Lənbəranski Tv365 kanalında çıxışı zamanı cəmiyyətdə müşahidə olunan bəzi neqativ hallarla bağlı narahatlığını ifadə edib.

O bildirib ki, bəzi şəxslərin sosial şəbəkələr və müxtəlif platformalar üzərindən qanunsuz və ictimai etikaya zidd davranışlar nümayiş etdirməsi cəmiyyətdə narazılıq yaradır. Onun sözlərinə görə, bu cür hallar hüquq-mühafizə orqanları tərəfindən müəyyən hallarda inzibati qaydada cəzalandırılsa da, həmin şəxslərin qısa müddət sonra eyni fəaliyyətə davam etməsi problemi daha da dərinləşdirir.

Elçin Lənbəranski qeyd edib ki, bu vəziyyət vətəndaşlar arasında narahatlıq yaradır və hüquq-mühafizə orqanlarının daha sərt və davamlı tədbirlər görməsinə ehtiyac var.

Onun sözlərinə görə, cəmiyyətdə zəhmətkeş insanların çətinliklə yaşadığı bir şəraitdə bəzi şəxslərin sosial mediada qeyri-adekvat davranışlarla diqqət çəkməsi ədalət hissinə mənfi təsir göstərir.

Elçin Lənbəranski əlavə edib ki, bu kimi halların qarşısının alınmaması ictimai nizam-intizam üçün risk yaradır və qanunların daha effektiv tətbiqi vacibdir.