"İranın hər zaman sona qədər dözüb, son anda geri çəkildiyini görürük"- İlham İsmayıl

"Əgər müharibə olacaqsa və onun yaradacağı çətinliklərdən danışmamışdan əvvəl, ilk növbədə müharibənin reallığını daha dəqiq müəyyənləşdirməliyik. Doğrudanmı bu müharibə baş verəcək və elə mi miqyasda olacaq ki, artıq qaçqın axını yaranacaq, yaxud İran parçalanacaq və hətta onun daxilində bir-iki yeni dövlət meydana çıxacaq? Bütün bunları əvvəlcədən müəyyənləşdirmək lazımdır."

Təhlükəsizlik eksperti İlham İsmayıl bunu News365.az-a açıqlamasında deyib. 

"Biz bilirik ki, ABŞ-ın prezidenti Donald Tramp indiyədək bu iki ay ərzində bir sıra bu qəbildən olan bəyanatlar verib. Bu bəyanatlarda zaman-zaman dəyişikliklər olsa da, İranla bağlı mövqeyində əvvəl hansı fikirdə idisə, onu davam etdirir. Yəni o, konkret şəkildə İrana xəbərdarlıq edir: əgər nüvə zənginləşdirilməsi ilə bağlı fəaliyyətlərdən və atom bombası hazırlamaqdan imtina etməsəniz, bombardman olacaq. Bu baxımdan bu hadisələrin reallıq payı az deyil.

Amma gəlin baxaq, görək, İran bu sonadək inadını davam etdirəcəkmi? İranın keçmiş diplomatik davranışlarına baxsaq, hər zaman sona qədər dözüb, son anda geri çəkildiyini görürük. Bu, 2016-cı ildə də belə olmuşdu. Yəni geri çəkilmişdilər. İndi də geri çəkilmə ehtimalı var. Sadəcə, mühafizəkarlar daha çox Xameneiyə təzyiq göstərirlər ki, İran və ABŞ arasında dilin tonu, münasibətlərin üslubu dəyişməlidir. Biz buna hazırıq. İndiyədək məktublaşmalar olub, Türkiyə və Birləşmiş Ərəb Əmirlikləri vasitəsilə, OMAN vasitəsilə. İndi isə yeni vasitəçilərlə başqa danışıqlara da gedə bilərik. Vyanada görüşlər təşkil oluna bilər.

Artıq bu cür yumşalmalar müşahidə olunur və böyük ehtimalla yeni bir müharibə əvəzinə bu danışıqlar yolu ilə İran geri çəkiləcək. Əgər İran geri çəkilməsə, reallıqda ABŞ-ın endirəcəyi zərbələr təkbaşına yox, təbii ki, İsraillə birgə olacaq. Bu baxımdan, hələ ki vəziyyətə şükür etmək olar.