“27 Sentyabr tarixi Azərbaycan xalqının ən qürurlu,
şanlı günlərindən biridir. Həmin tarixdə Azərbaycan xalqı öz kimliyini bir daha
dünyaya nümayiş etdirdi. 27 Sentyabr tarixinə qədər keçmiş münaqişə vəziyyətinin
dinc vasitələrlə tənzimlənməsi üçün əlimizdən gələn səyi göstərdik.”
Bu sözləri News365.az-a açıqlamasında siyasi elmlər doktoru Elşad Mirbəşir oğlu deyib. O, 44 günlük zəfərin başlanğıcı olan 27 Sentyabr tarixinin əhəmiyyəti haqqında danışıb.
“Ölkə
prezidenti qeyd edirdi ki, biz öz torpaqlarımızı hərbi yolla işğaldan azad etmək
gücündəyik. Azərbaycanın bu çağırışlarına dünya ictimaiyyəti
lazımi reaksiyanı vermədi. 27 Sentyabr tarixində Azərbaycan sübut etdi ki, sərgilədiyi
mövqe heç də ritorik deyil. Bu mövqe və fikirlərin arxasında real güc, potensial
dayanırdı.
Bu tarixdə Ermənistanın növbəti təxribatlarının qarşısını almaqla yanaşı, biz ərazilərimizi işğaldan azad etmək əməliyyatına da başladıq. Azərbaycan ordusu nəyə qadir olduğunu bütün dünyaya sübut etdi."
"Müharibənin ilk həftəsində işğalçı Ermənistan
ordusunun 20-25%-i məhv edilmişdi. Ermənistan ordusunun müdafiə sədlərini ağır
coğrafi şəraitdə yararaq öz torpaqlarımızı 44 gün ərzində işğaldan azad etdik.
Bu, Azərbaycan xalqının obrazını bir daha dünyaya tanıtdı.
Dünya bir daha gördü ki, Azərbaycan xalqı çox sülhsevər xalqdır. Çünki öz
torpaqlarını hərbi yolla işğaldan azad etmək imkanına malik olsa da, o qan
tökülməməsi, geniş miqyaslı müharibənin baş verməməsi üçün keçmiş münaqişə vəziyyətini
dinc vasitələrlə tənzimləməyə çalışırdı.
Azərbaycanın bu mövqeyi düzgün reaksiyayla qarşılanmadığı zaman biz öz torpaqlarımızı hərbi yolla işğaldan azad edərək dünyaya nümayiş etdik ki, həqiqətəndə hər zaman öz torpaqlarımızı Ermənistan işğalından hərbi yolla azad etmək imkanımız var."
Müsahibimiz açıqlamasında Azərbaycanı daha böyük hədəflərin gözlədiyini vurğulayıb.
"27 Sentyabr Azərbaycanın müasir tarixinin qızıl hərflərlə yazılmış, “Qarabağ Azərbaycandır!” ifadəsini əbədiləşdirən tarixidir. Bu tarix bir çox şeyin təməli oldu. Biz tarixi inkişafımızın yeni mərhələsinə qədəm qoymuşuq. Bu mərhələdə bizi daha böyük hədəflər, uğurlar gözləyir."