Trump və Musk əleyhinə genişmiqyaslı aksiyalar keçirilir

ABŞ-da etirazlar başladı: Trump və Elon Musk əleyhinə genişmiqyaslı aksiyalar keçirilir

News365.az xəbər verir ki, Amerika Birləşmiş Ştatlarının 50 ştatında Prezident Donald Trump və milyarder iş adamı Elon Musk-a qarşı genişmiqyaslı etiraz aksiyaları keçirilir. Nümayişlərdə 500 mindən çox insanın iştirak etdiyi bildirilir.

Etirazçılar Trump-ın yenidən prezident seçilməsindən sonra həyata keçirdiyi "Project 2025" adlı planına qarşı çıxır və sosial xidmətlərin təhlükə altında olduğunu vurğulayırlar. Eyni zamanda, Musk-ın da hökumət siyasətlərinə təsir göstərərək iş yerlərinin ixtisarı və iqtisadi manipulyasiyalar yolu ilə bu sahəyə zərər vurduğu iddia edilir.

Aksiyalar yalnız ABŞ ilə məhdudlaşmır. Kanada, İngiltərə, Almaniya, Fransa, Meksika və Portuqaliya kimi ölkələrdə də bənzər etirazların keçiriləcəyi gözlənilir.

Ağ evdən açıqlama
Etirazların geniş vüsət almasından sonra Ağ Evdən ilk rəsmi reaksiya gəlib. Ağ Evin mətbuat katibinin müavini Liz Huston bildirib ki, Prezident Trump sosial təminat proqramlarını – Sosial Təminat, Medicare və Medicaid-i qoruyacağını vəd edir. O, Demokratları qeyri-qanuni mühacirlərə sosial yardımlar ayırmaqda və vəziyyəti gərginləşdirməkdə günahlandırıb.

Etirazların yaxın günlərdə daha da böyüyəcəyi və siyasi atmosferin gərginləşəcəyi proqnozlaşdırılır.