“Ermənistan Azərbaycandan hərbi təhdid gözləyir” Aydın Quliyev
"Son dövrlərdə Ermənistan mediası, diplomatiyası və siyasi dairələri Azərbaycan və Türkiyəyə qarşı qaralama kampaniyalarını artırıb. Hətta bəzi iddialara görə, beynəlxalq münasibətlərin hazırkı şəraitində Türkiyənin fəal dəstəyi ilə Azərbaycanın Ermənistana qarşı açıq hərbi əməliyyatlara başlaya biləcəyi ehtimalları yayılır. Belə bir kontekstdə Türkiyə-Ermənistan münasibətləri və bu münasibətlərin Azərbaycanla bağlı aspektləri xüsusi aktuallıq daşıyır."
Politoloq Aydın Quliyev bunu News365.az-a deyib.
"Hazırda Ermənistan beynəlxalq münasibətlərdə yeni imkanların yarandığını düşünür. Ermənistan rəhbərliyi qlobal siyasi mühitin sürətlə dəyişdiyini anlayaraq, öz siyasətini buna uyğun yenidən formalaşdırmağa çalışır. Xüsusilə də ABŞ-da Donald Trampın hakimiyyətə qayıtması halında beynəlxalq nizamın tamamilə dəyişə biləcəyi ehtimalları Ermənistanın strateji hesablamalarına təsir edir. Bundan əlavə, Avropa İttifaqının daxili problemləri və Rusiyanın mövqeyini qorumağa çalışması fonunda Ermənistan öz xarici siyasətində yeni istiqamətlər axtarır.
Bu kontekstdə Ermənistan Türkiyə ilə münasibətləri normallaşdırmağa və bu vasitə ilə Qərbə açılmağa çalışır. Digər tərəfdən, Rusiya ilə münasibətlərin gərgin olması səbəbindən Ermənistan İranla əlaqələrini daha da gücləndirmək niyyətindədir.
Beləliklə, Türkiyə-Ermənistan münasibətlərinin gələcəyi, Azərbaycanın bu proseslərdəki rolu və Ermənistanın yeni geosiyasi reallıqlara uyğun siyasət yürütmək cəhdləri regionun strateji mənzərəsinə ciddi təsir göstərəcək əsas amillərdən biri olaraq qalır.
