Britaniya hava limanlarında xaos davam edir: Yüzlərlə uçuş təxirə salındı

Böyük Britaniyanın hava hərəkətinə nəzarət sistemində (NATS) baş verən texniki nasazlıq ölkə daxilində ciddi nəqliyyat böhranına səbəb olub. Çərşənbə günü "Hitrou", "Qatvik", "Mançester" və "Strouted" başda olmaqla bir çox əsas hava limanlarında uçuşların gecikməsi və ləğvi davam edir.

News365.az-ın məlumatına görə, texniki problem nəticəsində 1000-dən çox reys ləğv edilib, on minlərlə sərnişin hava limanlarında çarəsiz qalıb. FlightRadar24 aviasiya izləmə platformasının yaydığı son göstəricilərə əsasən:

• Hitrou Hava Limanı: Çərşənbə günü səhər saat 06:00 radələrinə olan məlumata görə 246 reys ləğv edilib, 350-dən çox uçuşda isə ciddi gecikmələr qeydə alınıb.

• Qatvik Hava Limanı: Ən azı 33 uçuş tamamilə təxirə salınıb.

• Digər təsirlənən zonalar: "Birmingem", "Southend", "London Siti", eləcə də Men və Cersi adalarının hava limanlarında da analoji nəqliyyat paralici yaşanır.

"Hitrou" hava limanının "X" sosial şəbəkə hesabından verilən rəsmi açıqlamada təyyarələrin eniş və qalxışının müvəqqəti olaraq tam dayandırıldığı bildirilib və yaranan narahatlığa görə sərnişinlərdən üzr istənilib.

Aviasiya ekspertləri texniki nasazlıq aradan qaldırılsa da, zəncirvari gecikmələrin və ləğvlərin gün ərzində davam edəcəyini vurğulayırlar.

News365.az