"Deputat Frank Şvabenin iddiaları əsassızdır" – Samir Vəliyevdən sərt reaksiya

“Azərbaycan ərazi bütövlüyünü və suverenliyini bərpa etdikdən sonra müəyyən beynəlxalq dairələr və “siyasətçilər” ölkəmizə qarşı qərəzli yanaşma ortaya qoyurlar. Bütün bunlar beynəlxalq hüququn və ədalət prinsiplərinin açıq-aşkar pozulması şəraitində baş verir. Azərbaycana qarşı ədalətsiz mövqe tutan Avropa Şurası Parlament Assambleyası  da (AŞPA) erməni lobbisinin, anti-azərbaycançı mərkəzlərin əlində alət olduğu üçün Avropa dəyərlərini tapdalayır. Təşkilatın Almaniyadan olan üzvü, sosial-demokrat fraksiyasının rəhbəri Frank Şvabeninin mövqeyi də bunun göstəricisidir”.

Bu fikirləri Milli Məclisin deputatı Samir Vəliyev News365.az-a deyib.

Deputat xatırladıb ki, F.Şvabeninin bugünlərdə yenə də Azərbaycanda “siyasi məhbus” olduğunu iddia etməsi, hüquqi müstəvidə məsuliyyətə cəlb olunmuş Əli Kərimli ilə bağlı fikirləri tamamilə əsassızdır. Təəssüf ki, AŞPA-da ölkəmizə qarşı qərəz və böhtanların səsləndirilməsi adi hala çevrilib. Millət vəkili xatırladıb ki, hələ iyun ayında  AŞPA-nın sessiyasında qəbul olunmuş növbəti qərəzli qətnamə də təşkilatın ölkəmizə qarşı “ənənəvi” mövqeyinin göstəricisi oldu. Demokratiya, insan haqları, söz azadlığı, “siyasi məhbus” və s. kimi məsələlər təşkilatın Azərbaycana qarşı uydurma təzyiq vasitəsidir. Avropa Şurasının fəaliyyətində insan haqları əsas yer tutmalı olsa da, Azərbaycan ötən dövrdə üzləşdiyi qaçqın-köçkün problemi ilə əlaqədar qurumdan ədalətli yanaşma görməyib. AŞPA, o cümlədən Şvabe Ermənistanın 30 illik işğal siyasətinə qarşı heç bir mövqe bildirməyib. Halbuki, bir quruma üzv olan iki ölkədən birinin digərinin ərazisini işğal etməsi faktına görə ən azından işğalçının səs hüququ əlindən alına bilərdi. 2001-ci ildə Azərbaycan bu təşkilata üzv olarkən onun Ermənistanın işğalçı siyasətinə qarşı ciddi addımlar atacağına ümid edirdi. Lakin ötən dövrün təcrübəsi göstərir ki, ermənipərəst, islamofob qüvvələr bu təşkilatdan daim Azərbaycana qarşı vasitə kimi istifadə ediblər. Bu da Azərbaycana qarşı ikili standartların bariz nümunəsidir.

Samir Vəliyevin fikrincə, AŞPA islamofob və türkəfob təfəkkürlü nümayəndələrin düşərgəsidir. Bunu sübut edən faktlardan biri də 2024-cü il qış sessiyasında AŞPA-da ölkəmizin nümayəndə heyətinin etimadnamələri təsdiq edilməməsidir. Bu təşəbbüsü də Almaniyanı təmsil edən deputat Frank Şvabe irəli sürmüşdü. Frank Şvabe təşəbbüsü irəli sürərkən Azərbaycanın öz ərazi bütövlüyünü və suverenliyini bərpa etməsindən çox “narahat” görünürdü. Amma Azərbaycan bunu cavabsız qoymayıb və nümayəndə heyətimiz təşkilatdakı fəaliyyətini dayandırıb.

 “Hazırda AŞPA Avropa dəyərlərinin daşıyıcısı olan platformadan daha çox müəyyən xarici dairələrin əlində alət olan islamafob və türkəfob bir struktura çevrilib. Beynəlxalq münasibətlər sistemində baş verən hadisələrə beynəlxalq hüquq normaları əsasında deyil, sifarişlər əsasında sənədlər qəbul edən AŞPA-nın və onun Şvabe kimi üzvlərinin Avropa məkanında nüfuzu aşağı səviyyədədir. Təşkilat müxtəlif ölkələrə münasibətdə obyektiv yox, ikili standartlar və qərəz mövqeyindən çıxış edir. Şvabe və onun kimilər Azərbaycanın daxili işlərinə, məhkəmə proseslərinə qarışa bilməz. Ölkəmizdə heç bir siyasi məhbus yoxdur. Onların müdafiə etdiyi şəxslər konkret cinayət əməllərinə görə həbs olunublar. Əslində, bu tipli şəxslərin Şvabe tərəfindən müdafiə olunmasının başqa səbəbləri var. Çünki Ə.Kərimli kimilər F.Şvabenin də təmsil olunduğu anti-azərbaycançı mərkəzlərə xidmət edir. Ölkəmizdə öz əlaltılarını itirməkdən narahat olan həmin dairələr Azərbaycana böhtan atırlar. Amma belə cəhdlərin heç bir mənası yoxdur. Çünki bu gün Azərbaycan dünyada nüfuzlu dövlətdir. Ərazi bütövlüyümüzün və suverenliyimizin bərpası ölkəmizin mövqelərini daha da möhkəmləndirib. Əgər Azərbaycan AŞPA-nı tərk edərsə, bu dövlətimizin deyil, həmin təşkilatın nüfuzuna zərbə olacaq. Çünki təşkilat bununla Cənubi Qafqazın liderini, Avropa İttifaqının strateji tərəfdaşını itirəcək. Ona görə də, AŞPA rəhbərliyi bu barədə düşünməli, ölkəmizə qarşı qara piara son qoyulmalıdır”,-deyə deputat vurğulayıb.