“Müasir dövrdə hər bir ölkənin qarşısında bir sıra strateji vəzifələr dayanır. Ən əsas məqsədlərdən biri təhsilin bütün pillələrinin dinamik inkişafına nail olmaqdır. Azərbaycan da bu sahədə ciddi nailiyyətlər əldə edir”.
Bu fikirləri Milli Məclisin
deputatı Samir Vəliyev News365.az-a deyib.
Deputat
bildirib ki, Azərbaycanda təhsilin inkişafı konseptual xarakter daşıyır. Ölkəmizdə
təhsil sistemi konkret proqramlar əsasında qarşıya qoyulmuş hədəf və məqsədlərin
fonunda inkişaf dinamikasına malikdir. Azərbaycanda təhsil infrastrukturunun
müasir tələblərə uyğun qurulması, təhsilin məzmununun yeniləşdirilməsi, təhsil
alanların nailiyyətlərinin qiymətləndirilməsi üzrə yeni model və mexanizmlərin
tətbiqi, əmək bazarının tələbatına uyğun kadr hazırlığı və təminatının
yaxşılaşdırılması, təhsil müəssisələrinin informasiya-kommunikasiya
texnologiyaları ilə təmin edilməsi və təhsil sisteminin informasiyalaşdırılması
sahələrində uğurlar əldə olunub. Digər tərəfdən, məktəbəqədər, texniki peşə,
ali təhsil, xaricdə təhsil, istedadlı uşaqların inkişafı, xüsusi qayğıya
ehtiyacı olan uşaqların təhsilinin təşkili və digər bu kimi sahələrdə də mühüm
irəliləyişlər mövcuddur.
Millət
vəkilinin sözlərinə görə, son illər məktəbəqədər təhsil pilləsində də nəzərəçarpan
yeniliklər var. Məktəbəqədər təhsil ölkəmizdə fasiləsiz təhsil sisteminin ilk
pilləsi kimi fərdin, cəmiyyətin və dövlətin maraqları nəzərə alınmaqla davamlı
inkişaf etdirilən prioritet fəaliyyət sahəsidir. Məktəbəqədər təhsil vasitəsilə
uşaqların erkən yaş dövrlərində əqli, fiziki, yaradıcı potensialının və mədəni
səviyyəsinin inkişafının, psixoloji dayanıqlığının, estetik tərbiyəsinin, sadə əmək
vərdişlərinə yiyələnməsinin, ətraf aləmə, şəxsi sağlamlığın qorunmasına həssas
və şüurlu münasibətinin, zəruri həyati bacarıqlara yiyələnməsinin, şəxsiyyətinin
formalaşdırılmasının əsası qoyulur. Uşaqların bu prinsiplər əsasında
formalaşdırılması üçün təbii ki, peşəkar mütəxəssislərin olması da vacib şərtlərdən
biridir. Bu baxımdan, dövlət məktəbəqədər təhsil müəssisələrində çalışan tərbiyəçi-müəllimlərin
və metodistlərin sertifikatlaşdırılması prosesinin keçirilməsi əhəmiyyətli
addımdır. Dekabrın 5–6-da dövlət məktəbəqədər təhsil müəssisələrində çalışan tərbiyəçi-müəllimlərin
və metodistlərin sertifikatlaşdırılması prosesinin test imtahanı mərhələsi
keçiriləcək.
Samir
Vəliyev qeyd edib ki, bu sertifikatlaşdırmanın keçirilməsində əsas məqsəd məktəbəqədər
təhsil müəssisələrində pedaqoji fəaliyyətlə məşğul olan, ali və orta ixtisas təhsilinə
malik təhsilverənlərin peşəkarlıq səviyyəsini və peşə yararlılığını yoxlamaq,
onların peşəkar inkişafına nail olmaq və təlim ehtiyaclarını müəyyənləşdirməkdir.
Bu prosesin təşkili zamanı qanunvericiliklə müəyyən edilmiş iştirak şərtləri və
prosesdə iştirak etməyən şəxslərə dair istisnalar da nəzərə alınır.
Sertifikatlaşdırılma prosesində ümumilikdə 9 minə yaxın şəxsin iştirakı gözlənilir.
“Ümid
edirik ki, proses bu sahədə çalışan mütəxəssislərin peşəkarlığının daha da
artmasına müsbət təsir göstərəcək. Nəzərə alaq ki, məktəbəqədər təhsil uşaqların
milli-mənəvi və bəşəri dəyərlər ruhunda, dövlət maraqları və azərbaycançılıq məfkurəsi
əsasında tərbiyə olunmasına istiqamətləndirilir, ümumi təhsilə hazırlığını təmin
edir. Uşağın məktəbdəki uğurlu təhsili, şəxsiyyət kimi formalaşması, ictimai həyatda
iştirak etməsi məktəbəqədər dövrdə qoyulmuş təməldən əhəmiyyətli dərəcədə
asılıdır. Bu baxımdan, bu sahədə çalışan şəxslərin üzərinə böyük məsuliyyət
düşür. Ona görə də, sertifikatlaşdırılma prosesi çox böyük önəm kəsb edir” –
deyə, Samir Vəliyev vurğulayıb.