Sənəd və bəyanatlar etibar zəminini tam formalaşdırmağa qadir deyil- TƏHLİL

Son 1 il ərzində Rusiya ilə münasibətlərin gərginləşməsindən Azərbaycan xarici siyasəti əslində kifayət qədər uğurla istifadə etdi. Münasibətlərin gərginləşməsi fonunda rəsmi Bakı Avropa və Vaşinqtonla mövqelərini yaxınlaşdıra bildi. Avqustda Vaşinqtonda baş tutan sammit və burada Ermənistanla sülh müqaviləsinin paraflanması, ABŞ-ın 907-ci düzəlişinin ləğvinə nail olunması, TDT çərçivəsində aktivliyin artması əslində Rusiya ilə münasibətlərin soyumasının müsbət təsirlərindəndir.

Bəli, Düşənbədə liderlər arasında təmas oldu. Bu, bir qədər gərgin münasibətlərdə yumşalma olacağına işarədir. Ancaq bu, üzü dekabra tərəf Moskvada qar əvəzinə qızmar günəş olacağı anlamına gəlmir.

Məlumdur ki, hal-hazırda Azərbaycanın hüquq-mühafizə orqanları tərəfindən ölkənin iqtisadi maraqlarına qarşı ciddi təxribatla bağlı cinayət işi araşdırılır və burada əsas iştirakçılar sırasında şimal qonşunun şirkətlərinin adları çəkilir.

Bəli, təmas və müzakirə həmişə gərginlikdən yaxşıdır, ancaq baş verənlər göstərir ki, sadəcə sənəd və bəyanatlar etibar zəminini tam formalaşdırmağa qadir deyil. Bunun üçün Rusiya tərəfindən səmimi münasibət və real addımlar lazımdır.

Aqil Məmmədov, siyasi ekspert