“Rusiyanı təcrid edə bilmədilər” – Putin sanksiyalardan danışdı

“Rusiyanı təcrid edə bilmədilər” – Putin sanksiyalardan danışdı
12:46

Qərbin Rusiyanı iqtisadi təzyiqlər vasitəsilə zəiflətmək və beynəlxalq bazarlardan təcrid etmək siyasəti Moskvanın gözlədiyi çətinliklərə səbəb olmayıb. Əksinə, Rusiya Prezidenti Vladimir Putin hesab edir ki, sanksiyalar ölkəni daxili istehsalı genişləndirməyə və texnoloji imkanlarını gücləndirməyə sövq edib.

News365.az "RİA Novosti"yə istinadən xəbər verir ki, Putin bu fikirləri noyabrın 18-də Çinin Şençjen şəhərində Asiya-Sakit Okean İqtisadi Əməkdaşlıq sammiti çərçivəsində keçirilən biznes forumunda səsləndirib.

Rusiya liderinin sözlərinə görə, ölkəni sanksiyalarla təcrid etmək cəhdləri nəticə verməyib və Moskva yaranmış iqtisadi çətinliklərin öhdəsindən gəlməyi bacarıb. O bildirib ki, əvvəllər iqtisadi təzyiq vasitəsi kimi istifadə olunan mexanizmlər artıq əvvəlki təsir gücünə malik deyil.

Putin vurğulayıb ki, sanksiyalar və gömrük tarifləri müəyyən təsir göstərsə də, rəqib ölkələrin iqtisadiyyatını çökdürmək gücündə deyil. Onun fikrincə, istehsal və əlavə dəyər zəncirlərinə süni maneələrin yaradılması məhdudiyyətləri tətbiq edən dövlətlərin öz iqtisadiyyatlarına da ciddi zərər vurur.

Rusiya Prezidenti xüsusilə Avropa İttifaqının üzləşdiyi problemlərə diqqət çəkib. O, artan inflyasiya, büdcə kəsiri və sənaye potensialının zəifləməsini Qərbin iqtisadi məhdudiyyətlərinin yaratdığı nəticələr sırasında göstərib.

Putin əlavə edib ki, xarici təzyiqlər Rusiya iqtisadiyyatı üçün müəyyən mənada inkişaf stimuluna çevrilib. Onun sözlərinə görə, bu proses ölkəni texnoloji müstəqilliyini möhkəmləndirməyə, əmək məhsuldarlığını yüksəltməyə və istehsal infrastrukturunu yeniləməyə vadar edib.

Rusiya lideri hesab edir ki, məhdudiyyətlər yerli istehsalın genişləndirilməsi, əsas məhsulların ölkə daxilində istehsalının mənimsənilməsi və daxili bazarın keyfiyyətli yerli məhsullarla təmin olunması istiqamətində də imkanlar yaradıb.

News365.az


Sizin reklam burada
Sizin reklam burada