Qarabağ atları: Azərbaycanın “qızıl mirası” qorunur

Qarabağ atları Azərbaycanın ən qədim və tanınmış milli at cinslərindən biri hesab olunur. Özünəməxsus qızılı rəngi, zərif görünüşü, dözümlülüyü və çevikliyi ilə seçilən bu atlar əsrlər boyu Qarabağın simvollarından birinə çevrilib. 

Qarabağ atlarının əsas xüsusiyyətlərindən biri dağlıq ərazilərdə hərəkət qabiliyyətidir. Mütəxəssislərin məlumatına görə, atlar sürətli yürüş zamanı qəfil dayana bilir, az tərləyir və xüsusilə dağ yollarında yüksək dözümlülük nümayiş etdirir. Müasir Qarabağ atlarının hündürlüyü əsasən 144–154 santimetr arasında olur. 

Bu cinsin tarixində Ağdam Atçılıq Zavodu xüsusi yer tutur. Zavod 1948–1949-cu illərdə yaradılıb və Qarabağ atlarının qorunub saxlanılması və artırılmasında mühüm rol oynayıb. 1956-cı ildə “Zaman” adlı Qarabağ atının Britaniya kraliçası II Elizabetə hədiyyə edilməsi isə cinsin beynəlxalq şöhrətinin göstəricilərindən biri olub. 

1993-cü ildə Ağdamın işğalından sonra atçılıq zavodu fəaliyyətini Ağcabədi rayonunun Xamtorpaq ərazisində davam etdirib. Bununla belə, Qarabağ atlarının genofondunun qorunması istiqamətində işlər davam etdirilir. 

Qızılı rəngli görünüşünə görə xalq arasında “sarılar”, öz doğma yurdunda isə “köhlənlər” kimi tanınan Qarabağ atları bu gün də Azərbaycanın milli irsinin canlı nümunələrindən biri sayılır.