“Azərbaycanda təhsilin inkişafı ölkə siyasətinin və insan kapitalının gücləndirilməsinin əsas istiqamətlərindən biridir. Müasir dövrdə hər bir ölkənin qarşısında strateji vəzifələr dayanır. Ən əsas məqsədlərdən biri təhsilin bütün pillələrinin dinamik inkişafına nail olmaqdır. Azərbaycan da bu sahədə ciddi nailiyyətlər əldə edir”.
Bu fikirləri Milli Məclisin deputatı Samir Vəliyev News365.az-a deyib.

Deputat bildirib ki, Azərbaycanda təhsilin inkişafı konseptual
xarakter daşıyır. Ölkəmizdə təhsil sistemi konkret proqramlar əsasında qarşıya
qoyulmuş hədəf və məqsədlərin fonunda inkişaf dinamikasına malikdir.
Azərbaycanda təhsil infrastrukturunun müasir tələblərə uyğun qurulması,
təhsilin məzmununun yeniləşdirilməsi, təhsil alanların nailiyyətlərinin
qiymətləndirilməsi üzrə yeni model və mexanizmlərin tətbiqi, əmək bazarının
tələbatına uyğun kadr hazırlığı və təminatının yaxşılaşdırılması, təhsil müəssisələrinin
informasiya-kommunikasiya texnologiyaları ilə təmin edilməsi və təhsil
sisteminin informasiyalaşdırılması sahələrində uğurlar əldə olunub. Digər
tərəfdən, məktəbəqədər, texniki peşə, ali təhsil, xaricdə təhsil, istedadlı
uşaqların inkişafı, xüsusi qayğıya ehtiyacı olan uşaqların təhsilinin təşkili
və digər bu kimi sahələrdə də mühüm irəliləyişlər mövcuddur.
Millət vəkilinin sözlərinə görə, təhsildə inkişaf ali məktəblərdə də
özünü ifadə edir. Ötən dövrdə ali məktəblərin beynəlxalq standartlara
uyğunlaşdırılması, dünya təhsil sisteminə inteqrasiya özünün müsbət
nəticələrini verməkdədir. Azərbaycanın 10 universitetinin QS beynəlxalq
reytinqinin ilk 1000-liyində yer alması da bu baxımdan xüsusi vurğulanmalıdır.
Bu fakt ölkəmizin ali təhsil sistemində əldə etdiyi mühüm nailiyyətlərdən
biridir. Bu göstərici Azərbaycan universitetlərinin beynəlxalq akademik məkanda
mövqelərinin möhkəmləndiyini, elmi-tədqiqat potensialının və rəqabət
qabiliyyətinin artdığını nümayiş etdirir.
Samir Vəliyev qeyd edib ki, bu uğuru yalnız reytinq göstəricisi kimi
deyil, həm də ölkədə ali təhsilin keyfiyyətinin yüksəldilməsi, beynəlxalq
əməkdaşlığın genişləndirilməsi, elmi fəaliyyətin stimullaşdırılması və
universitetlərin qlobal təhsil məkanına inteqrasiyası istiqamətində həyata
keçirilən məqsədyönlü siyasətin nəticəsi kimi qiymətləndirmək olar: “Xüsusilə
qeyd etmək lazımdır ki, universitetlərin beynəlxalq reytinqlərdə təmsil
olunması onların xarici tələbələr və akademik heyət üçün cəlbediciliyini artırır,
beynəlxalq tərəfdaşlıqların qurulmasına və elmi mübadilənin genişlənməsinə
şərait yaradır. Eyni zamanda, bu nəticələr qarşıda duran vəzifələri də
müəyyənləşdirir. Növbəti mərhələdə elmi nəşrlərin keyfiyyətinin və sayının
artırılması, beynəlxalq elmi əməkdaşlığın gücləndirilməsi, innovasiya və
tədqiqat fəaliyyətinin genişləndirilməsi, tədris prosesində müasir yanaşmaların
tətbiqi əsas prioritetlər olmalıdır”.
“Ümumilikdə, Azərbaycanın 10 universitetinin QS reytinqinin ilk
1000-liyində yer alması ölkənin ali təhsil sisteminin beynəlxalq rəqabət
qabiliyyətinin yüksəldiyini göstərən müsbət tendensiyadır. Bu nailiyyət həm də
Azərbaycan universitetlərinin qlobal akademik məkanda daha güclü mövqelər
qazanması üçün mühüm stimul və gələcək inkişaf baxımından ciddi potensial
deməkdir” – deyə, millət vəkili vurğulayıb.