Məhkəmə generalın mülkünə həbs qoydu

Rusiya Silahlı Qüvvələrinin Baş Rabitə İdarəsinin rəisi, Silahlı Qüvvələrin Baş Qərargah rəisinin müavini, general-leytenant Vadim Şamarinə qarşı cinayət işi çərçivəsində yeni detal üzə çıxıb. Onun “Mercedes-Benz” markalı avtomobili müsadirə edilib. Yerli media bu barədə iş materiallarına istinadən məlumat yayıb.

"Gazeta"nın məlumatına görə, bu, Şamarinin yeganə mülkü kimi qeyd edilib. Onun yaşadığı mənzil isə nazirliyin mülkiyyəti olub.

Fevralın 28-də Rusiya İstintaq Komitəsinin Baş Hərbi İstintaq İdarəsi Şamarinin dövlət müdafiə sifarişini yerinə yetirərkən xüsusilə külli miqdarda (36 milyon rubl) rüşvət almaqda təqsirli olduğuna dair kifayət qədər sübutlar topladıqdan sonra istintaqı başa çatdırıb.

İstintaq zamanı məlum olub ki, Şamarin 2019-2023-cü illər arasında Rusiya Müdafiə Nazirliyi ilə bağlanmış müqavilələr üzrə rabitə avadanlığının tədarük həcmini və dəyərini 1,4 milyard rubldan çox şişirtmək üçün “Perm Telefon Zavodu Telta” ASC-nin rəhbərliyindən rüşvət alıb.

Şamarinin mülkü - daşınmaz əmlakı, avtomobili, pulları aşkarlanaraq aldığı rüşvətin ölçüsünə bərabər məbləğdə müsadirə edilib. General hazırda həbsdədir. Şamarin təqsirini etiraf edib.

Tural