Ən böyük valyuta ehtiyatlarına malik ölkələr- SİYAHI
Beynəlxalq Valyuta Fondunun (BVF) məlumatlarına əsasən, dünyada ən böyük xarici valyuta ehtiyatlarına sahib ölkələrin siyahısı açıqlanıb.
Siyahıya Çin liderlik edir. Ölkənin valyuta ehtiyatları 3,41 trilyon dollar təşkil edir ki, bu göstərici ikinci yerdə olan Yaponiyadan (1,26 trilyon dollar) təxminən 3 dəfə çoxdur.
Ən böyük valyuta ehtiyatına malik ilk 10 ölkənin 7-si Asiyada yerləşir. Bu vəziyyət region ölkələrinin uzun illər ərzində ixracyönümlü iqtisadi siyasət yürütməsi, ticarət profisitləri və maliyyə ehtiyatlarını artırması ilə əlaqələndirilir.
İlk 15-likdə yer alan ölkələr:
- Çin – 3,41 trilyon dollar
- Yaponiya – 1,26 trilyon dollar
- İsveçrə – 932,3 milyard dollar
- Tayvan – 602,5 milyard dollar
- Hindistan – 543 milyard dollar
- Səudiyyə Ərəbistanı – 458,6 milyard dollar
- Honkonq – 442,1 milyard dollar
- Rusiya – 434,5 milyard dollar
- Cənubi Koreya – 423,1 milyard dollar
- Sinqapur – 419,3 milyard dollar
Siyahıda ABŞ 244,6 milyard dollar valyuta ehtiyatı ilə 13-cü yerdə qərarlaşıb. Ekspertlər bildirirlər ki, bunun əsas səbəbi dolların dünyanın əsas ehtiyat valyutası olmasıdır. ABŞ digər ölkələr kimi böyük həcmdə xarici valyuta toplamaq məcburiyyətində deyil.
Valyuta ehtiyatları ölkələr üçün iqtisadi təhlükəsizlik vasitəsi hesab olunur. Mərkəzi banklar bu ehtiyatlardan milli valyutanı qorumaq, idxal ödənişlərini həyata keçirmək, xarici borcları ödəmək və maliyyə böhranları zamanı bazarı dəstəkləmək üçün istifadə edirlər.
Məlumatlara görə, böyük ehtiyatların toplanmasına xüsusilə 1997-ci il Asiya maliyyə böhranından sonra diqqət artıb. Bir çox Asiya ölkəsi gələcək iqtisadi risklərə qarşı daha güclü maliyyə tamponları yaratmağa başlayıb.
