Restoran sahiblərinə BƏD XƏBƏR: Daha bunu deyə bilməyəcəklər

Azərbaycanda kartdan-karta pul köçürmələri üzrə yeni məhdudiyyətlərin tətbiqinə başlanılır.

Banklar dəyişikliklə bağlı müştərilərinə artıq SMS bildirişləri göndərməyə başlayıblar.

Yayılan məlumata əsasən, 1 avqust 2026-cı ildən etibarən bir bank kartından gün ərzində maksimum 5 kartdan-karta köçürmə həyata keçirmək mümkün olacaq.

Yeni məhdudiyyətlərin şəxsin öz adına açılmış bank hesabları və kartları arasında aparılan köçürmələrə şamil olunmadığı bildirilir. Bu halda müştərilər öz hesabları arasında əvvəlki qaydada vəsait köçürə biləcəklər.

Yeni qaydaların nağdsız ödəniş dövriyyəsinə, fərdi pul köçürmələrinə və kiçik sahibkarların hesablaşmalarına təsir göstərə biləcəyi ehtimal edilir.

Yeni qaydalara görə gün ərzində bir kartdan 5 köçürmək etmək mümkün olacaq. Bir kart da maksimum 5 köçürmə qəbul edə biləcək.

Kartdan karta köçürmələrin ümumi məbləğinə aylıq 20 min manat limit qoyulub. Bank müştərisinin öz kartları arasında həyata keçirilən əməliyyatlar bu məhdudiyyətlərə şamil edilmir, onlara limit qoyulmur.

Ödəniş kartlarının və elektron cüzdanların sayına da limit qoyulur. Belə ki, elektron cüzdanlar üzrə manatda 2 elektron cüzdan, hər bir xarici valyuta üzrə isə 1 elektron cüzdan istifadə oluna bilər.

Mövzu ilə bağlı News365.az-a danışan iqtisadçı Əkrəm Həsənov deyib ki, bu limitlər şəffaflığın artırılması, fırıldaq hallarının azaldılması, vergidən yayınma və qanunsuz mərc oyunlarının qarşısını almağa xidmət edir:

“Məqsədin səmimi olduğuna inanıram. Amma bəzi ölkələrdə buna limitlərin tətbiqi yolu ilə deyil, rəqəmsal monitorinq yolu ilə nail olunur. Yeni qayda gün ərzində bir kartdan daha çox köçürmə edən və yaxud pul qəbul eliyən şəxslərə problem yaradacaq. Məsələn bəzi restoranlar ödənişi posterminaldan yox, kartdan-karta qəbul edir. Artıq həmin restoranlar sutkada 5 müştəridən artığına deyə biməyəcək ki, “karta at”. Bundan başqa ianə alanlar üçün də problem yarana bilər. Amma ümumilikdə bu limitlər əhalinin əksəriyyəti üçün heç bir problem yaratmayacaq. Əksər hallarda bu limitlər həqiqətən də vergidən yayınmaq istəyənlər üçün müəyyən narahatlıq yaradacaq. Məsələn, mikrosahibkar müştərilərindən pulu hər dəfə kartına ala bilməyəcək.”.

News365.az