Bira ayda bank kartlarının sayı 2 dəfə artıb- SƏBƏB BU İMİŞ

“Hökumətimiz “kartdan-karta” pul köçürmələrə qadağa qoyanda açıqlama verdim ki, “İndi kartdan karta əməliyyatlarına məhdudiyyət tətbiq edərək gün ərzində 5-dən artıq ödəniş qəbul etməyə qadağa qoyublar. Nəticədə insanlar bir kart əvəzinə 8-10 kart aldılar. Kart alanların sayının artdığını gördükdə isə eyni bankdan manat hesablı debet kartının yalnız bir ədəd alınmasına icazə verdilər. İndi də bir bankdan kart ala bilməyənlər digər banklara üz tutacaqlar. Ölkədə 24 bank var, deməli, gedib başqa-başqa banklardan yenə 10-15 kart alacaqlar. Bəs nə dəyişəcək? Bir sözlə, saça kəpək düşəndə başı kəsmirlər, səbəbini tapıb müalicə edirlər”.

Bu fikirləri iqtisadçı Natiq Cəfərli söyləyib.

O qeyd edib ki, Azərbaycan Mərkəzi Bankının rəsmi məlumatında indi deyilir ki,  “Sentyabrın sonuna Azərbaycanda 23 milyon 388 min ədəd ödəniş kartı olub. Bu, avqustun sonu ilə müqayisədə 414 min ədəd və yaxud 1,8 % çoxdur”:

“Yəni, bu ilin avqust ayından Azərbaycanda "Card to card" əməliyyatlarına limit qoyulması fonunda ölkədə ödəniş kartlarının sayındakı artım iki dəfə sürətlənib.

Ona görə də hökümət hərdən bizi də eşitməli, fikirlərimizə diqqət etməlidir ki, sonradan bu cür acı mənzərə ilə üz-üzə qalmasın”.

News365.az