İrana irad: “Bəs azərbaycanlıların ana dilində təhsil hüququ?”

İran rəsmisinin Azərbaycanda məktəbli geyimi və qızların təhsil hüququ ilə bağlı açıqlaması müzakirələrə səbəb olub. Politoloq Turan Rzayev Tehranın bu mövzuda mövqeyini tənqid edərək İranda yaşayan azərbaycanlıların ana dilində təhsil imkanları məsələsini gündəmə gətirib.

Politoloq Turan Rzayev bu barədə News365.az-a açıqlamasında danışıb.

O bildirib ki, İranın elm, tədqiqat və texnologiya naziri Hüseyn Simayi Sərrafın Azərbaycan məktəblərində vahid geyim formasına münasibət bildirməsi və azərbaycanlı qızların İran universitetlərində təhsil ala biləcəyini söyləməsi ziddiyyətli yanaşmadır.

Rzayevin sözlərinə görə, İran rəsmisi Azərbaycanda təhsil hüququ və azad təhsil mühiti barədə danışmazdan əvvəl öz ölkəsində yaşayan azərbaycanlıların ana dilində təhsil almaq imkanları ilə bağlı vəziyyətə diqqət yetirməlidir.

Politoloq qeyd edib ki, İranda azərbaycanlıların ana dilində təhsil məsələsi uzun illərdir müzakirə olunur. Onun fikrincə, bu məsələ mövcud olduğu halda İran rəsmilərinin Azərbaycanın təhsil siyasəti ilə bağlı açıqlamalar verməsi suallar doğurur.

Turan Rzayev hesab edir ki, Azərbaycanın təhsil siyasəti ölkənin daxili məsələsidir və bu sahədə qərarlar Azərbaycanın öz səlahiyyətlərinə aiddir.

Politoloq vurğulayıb ki, İran rəsmiləri başqa ölkələrin təhsil sistemi ilə bağlı mövqe bildirməzdən əvvəl öz ölkələrində ana dili və təhsil hüquqları ilə əlaqəli problemlərə diqqət yetirməlidirlər.

O, fikirlərini ümumiləşdirərək bildirib ki, təhsil hüququ ilə bağlı müzakirələrdə əsas prinsip seçici yanaşmadan uzaq olmaq və eyni meyarları hər kəsə tətbiq etməkdir.