Kərə yağının idxal qiymətində fərq: Bir ölkədən 9, digərində 15 manat

Azərbaycana kərə yağı idxalına 98,4 milyon dollar xərclənib

2026-cı ilin yanvar-avqust aylarında Azərbaycana 15 min 966,69 ton kərə yağı idxal edilib. İdxalın ümumi dəyəri 98 milyon 420,03 min ABŞ dolları olub.

Hesablamalara əsasən, idxal olunan kərə yağının 1 kiloqramının orta gömrük dəyəri təxminən 10,49 manat təşkil edib.

Dövlət Gömrük Komitəsinin göstəricilərinə əsasən, hesabat dövründə Azərbaycana ən çox kərə yağı İran İslam Respublikasından gətirilib. Bu ölkədən 7 327,68 ton məhsul idxal olunub və idxalın dəyəri 38 milyon 68,24 min dollar təşkil edib. Beləliklə, İran mənşəli kərə yağının 1 kiloqramının orta idxal dəyəri təxminən 8,83 manat olub.

İdxalda ikinci yerdə Yeni Zelandiya qərarlaşıb. Bu ölkədən 2 124,2 ton kərə yağı 15 milyon 914,29 min dollar dəyərində gətirilib. Məhsulun 1 kiloqramının orta idxal dəyəri təxminən 12,73 manat təşkil edib.

Belarusdan 2 570,16 ton kərə yağı 14 milyon 437,01 min dollar, Səudiyyə Ərəbistanından isə 1 067 ton məhsul 9 milyon 395,55 min dollar dəyərində idxal edilib. Bu ölkələr üzrə 1 kiloqramın orta idxal dəyəri müvafiq olaraq təxminən 9,55 manat və 14,97 manat olub.

Ukraynadan 939,74 ton kərə yağı 5 milyon 842,81 min dollar dəyərində gətirilib. Finlandiyadan idxalın həcmi 742,45 ton, dəyəri isə 6 milyon 408,73 min dollar təşkil edib. Bu ölkələr üzrə 1 kiloqramın orta idxal dəyəri müvafiq olaraq 10,57 manat və 14,68 manat olub.

Eyni dövrdə Azərbaycandan 720,59 ton kərə yağı ixrac edilib. İxracın ümumi dəyəri 4 milyon 503,86 min dollar təşkil edib. Bu isə ixrac olunan məhsulun 1 kiloqramı üçün təxminən 10,63 manat orta dəyərə bərabərdir.

İxracın əsas istiqaməti Rusiya olub. Bu ölkəyə 560 ton kərə yağı 3 milyon 430,19 min dollar dəyərində göndərilib. Türkmənistana isə 160 ton məhsul 1 milyon 69,64 min dollar dəyərində ixrac olunub.