Banklarda problemli kreditlərin həcmi 17 faiz artıb

Azərbaycan bank sektorunda qeyri-işlək kreditlərin (QİK) həcmi 2026-cı ilin may ayına olan göstəricilərə görə artıb. Bankların ümumi qeyri-işlək kredit portfeli 2025-ci ilin mayında 776,4 milyon manat olduğu halda, 2026-cı ilin eyni dövründə 909,1 milyon manata yüksəlib. Bu, illik müqayisədə 132,7 milyon manat və ya 17,1 faiz artım deməkdir.

Artım əsasən biznes və istehlak kreditləri üzrə qeydə alınıb. Biznes kreditləri üzrə qeyri-işlək kreditlərin həcmi 420,8 milyon manatdan 519,2 milyon manata yüksəlib. Nəticədə bu sahədə problemli kreditlərin həcmi 98,4 milyon manat və ya 23,4 faiz artıb.

İstehlak kreditləri üzrə qeyri-işlək kreditlər də artıb. Bu göstərici 319,6 milyon manatdan 358,1 milyon manata çatıb ki, bu da 38,5 milyon manat və ya 12 faiz artım təşkil edir.

İpoteka kreditləri üzrə isə əks dinamika müşahidə olunub. Belə ki, ipoteka kreditlərində qeyri-işlək kreditlərin həcmi 36 milyon manatdan 31,8 milyon manata enib. Bu, 4,2 milyon manat və ya 11,7 faiz azalma deməkdir.

Qeyri-işlək kreditlərin ümumi kredit portfelinə nisbəti də yüksəlib. 2025-ci ilin mayında 2,7 faiz olan QİK/Kredit portfeli göstəricisi 2026-cı ilin mayında 2,9 faizə çatıb.

Kredit növləri üzrə problemli kreditlərin payına baxdıqda, biznes kreditlərində bu göstərici 2,8 faizdən 3,2 faizə yüksəlib. İstehlak kreditlərində 3,6 faizdən 3,7 faizə artım qeydə alınıb. İpoteka kreditlərində isə problemli kreditlərin payı 0,8 faizdən 0,7 faizə düşüb.

Ümumilikdə, bank sektorunda kreditləşmənin artması fonunda qeyri-işlək kreditlərin yüksəlməsi əsasən biznes və istehlak kreditləri istiqamətində müşahidə olunub.