Bakıda Xaqani Şirvaninin 900 illiyinə həsr olunan “Xaqani gecəsi” keçirilib - FOTOLAR

29 sentyabr 2026-cı il tarixində Beynəlxalq Muğam Mərkəzində Türk Mədəniyyəti və İrsi Fondu tərəfindən Azərbaycan Respublikasının Mədəniyyət Nazirliyinin dəstəyi ilə dahi Azərbaycan şairi və mütəfəkkiri Xaqani Şirvaninin 900 illik yubileyinə həsr olunmuş “Xaqani gecəsi” adlı bədii-musiqili tədbir keçirilib.

Tədbir Azərbaycan Respublikasının Prezidenti Zati-aliləri cənab İlham Əliyevin Xaqani Şirvaninin 900 illik yubileyinin qeyd olunması haqqında Sərəncamına uyğun olaraq təşkil edilib.

Tədbirin açılışında çıxış edən Türk Mədəniyyəti və İrsi Fondunun prezidenti, professor Aktotı Raimkulova Xaqani Şirvaninin əsərlərinin əsrlər boyu türk xalqlarının mənəvi dünyasında xüsusi yer tutduğunu diqqətə çatdırıb. Fondun zəngin nəşr fəaliyyətindən bəhs edən professor Aktotı Raimkulova təşkilat tərəfindən türk dünyasının görkəmli klassiklərinin irsinin müxtəlif dillərdə çap edilərək geniş oxucu auditoriyasına təqdim olunduğunu, bu istiqamətdə həyata keçirilən layihələrin isə ortaq mədəni irsin qorunması və təbliğinə xidmət etdiyini vurğulayıb.

Azərbaycan Yazıçılar Birliyinin Gənclər Şurasının sədri Fərid Hüseynin aparıcılığı ilə keçirilən tədbirdə Azərbaycan Milli Elmlər Akademiyasının prezidenti İsa Həbibbəyli və Milli Məclisin deputatı Hikmət Babaoğlu da çıxış edərək dahi şairin zəngin ədəbi irsi barədə fikirlərini bölüşüb, Fondun bu istiqamətdəki təşəbbüslərinin təqdirəlayiq olduğunu bildiriblər.

Tədbir çərçivəsində Xaqani Şirvaniyə həsr olunmuş pyeslər toplusunun təqdimatı keçirilib, eyni zamanda şairin həyat və yaradıcılığını əks etdirən bədii proqram təqdim olunub. Proqramda Xaqani Şirvaninin uşaqlıq və gənclik illərindən başlayaraq həyatının müxtəlif mərhələlərini əks etdirən səhnə obrazları təqdim edilib, şairin sözlərinə bəstələnmiş və ilk dəfə səsləndirilən musiqi əsərləri ifa olunub.

Bədii proqramda Cahangir Cahangirovun “Nazənin”, Tofiq Quliyevin “Bəxtəvər oldun”, Bəhram Nəsibovun “Gözəl nazənin” əsərləri səsləndirilib, 3 saylı Uşaq - gənclər inkişaf mərkəzinin “Xaqaninin uşaqlığı” mini-tamaşası, “Xaqaninin qəzəl-cavablaşmaları”, Xaqani və Məhəmməd Füzulinin əsərlərindən qiraətlər, həmçinin Xaqani qəzəllərinin muğam üstündə ifası təqdim edilib.

Tədbirdə Azərbaycanda akkreditə olunmuş diplomatik korpus nümayəndələri, beynəlxalq təşkilatların rəhbərləri, mədəniyyət və incəsənət xadimləri, ədəbiyyatşünaslar, elm adamları, həmçinin media nümayəndələri iştirak ediblər.