Spirtli içkilərin minimum qiyməti nəyi dəyişəcək? - MÜHÜM AÇIQLAMA

Xəbər verdiyimiz kimi Azərbaycanda spirtli içkilərin minimum qiyməti müəyyən edilir. Bununla bağlı qanun layihəsi artıq Milli Məclisə təqdim edilib. Amma spirtli içkilərin qiymətinin minimum həddinin müəyyən edilməsi cəmiyyətdə birmənalı qarşılanmayıb. Bəziləri iddia edir ki, belə vəziyyətdə bazara daha çox saxta və keyfiyyətsiz məhsul daxil olacaq.

Mövzu ilə bağlı News365.az–a danışan Millət vəkili, iqtisadçı ekspert Vüqar Bayramov bildirib ki, Milli Məclisdə müzakirəyə çıxarılan yeni qanun layihəsinə əsasən spirtli içkilər üçün minimum qiymət müəyyənləşdiriləcək:

“Dəyişikliklər araq məhsullarının qiymətinin minimumlaşdırılmasını nəzərdə tutur. Bu ilin ilk 9 ayında Azərbaycanda içkilər və tütün məmulatlarına 1 milyard 882 milyon manat xərclənib. Əvvəlki ilin uyğun dövrünə nisbətən vətəndaşlarımız içkilər və siqaretə 132 milyon manat daha çox pul ayırıb. Yəni, içki və tütün məhsullarının xərci ailə büdcəsində payı artmaqdadır.

Vətəndaşlarımız qazandıqları hər 100 manatın 5 manatını içkilər və siqaretə xərcləyirlər. İçki və tütün xərclərinin artması həmin məhsullarının qiymətinin yüksəlməsi ilə bağlı olsa da tələbin artması da müşahidə olunur. Ümumdünya Səhiyyə Təşkilatı Azərbaycanda spirtli içki istehlakının növbəti illərdə artacağını proqnozlaşdırır. Adambaşına istehlak indi 2.0 litr olduğu halda, bunun gələn il 2.5, 2030-cü ildə isə 3.9 litr olacağı gözlənilir. İstehlak artdıqca isə xərc də çoxalır.

Deməli, spirtli içkilər və tütün məhsullarının istehlakını azaltmaqla həm qənaət etmək, həm də daha sağlam olmaq mümkündür. Ona görə də, alkoqol və tütün məhsullarını istehlak etməkdənsə ixrac etmək daha faydalıdır”.

News365.az