Rusiyada həyəcanlı anlar: Mühərriki sıradan çıxan təyyarə tarlada yandı
Rusiyanın Saxalin vilayətində təlim uçuşu həyata keçirən təyyarədə həyəcanlı anlar yaşanıb. Havada olarkən mühərrikində texniki nasazlıq yaranan "An-3" tipli təyyarə adadakı açıq ərazidə yerləşən tarlalardan birinə məcburi sərt eniş edib. Enişdən dərhal sonra təyyarədə yanğın başlayıb.
News365.az xəbər verir ki, Rusiya Fövqəladə Hallar Nazirliyinin regional mətbuat xidməti və Yerli Meşəçilik və Ovçuluq Agentliyinin məlumatına görə, hadisə nəticəsində xoşbəxtlikdən xəsarət alan olmayıb.
Təyyarədə neçə nəfər var idi? Borta ümumilikdə 8 nəfər olub — “Dobrolet” aviaşirkətinin 2 ekipaj üzvü, 1 müşahidəçi pilot və Saxalin Hava Bazasının 5 paraşütçüsü.
Təxliyə: Alov təyyarəni bürümədən öncə göyərtədəki 8 nəfərin hamısı vaxtında təhlükəsiz zonaya təxliyə edilib.
Hazırda hadisə yerində araşdırma aparılır və mühərrikin sıradan çıxma səbəbləri mütəxəssislər tərəfindən öyrənilir.
