“Qocalar evi”nin sakini Ələsgər Ağayevin tibbi yardım ala bilməməsi ilə bağlı şikayətinə Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyi münasibət bildirib.
News365.az xəbər verir ki, Agentlikdən saytımıza verilən açıqlamada ahıl şəxslərin sağlamlığının diqqətdə saxlanıldığı və onların ehtiyaclarına uyğun tibbi və sosial xidmətlərlə təmin edildiyi bildirilib.
Qeyd olunub ki, Agentliyin Bilgəh qəsəbəsində yerləşən Ahıl şəxslər üçün sosial xidmət müəssisəsində sakinlərə fərdi ehtiyacları nəzərə alınmaqla sosial-məişət, tibbi-sosial, sosial-psixoloji, sosial-hüquqi və sosial-mədəni xidmətlər göstərilir.
Agentlikdən bildirilib ki, zərurət yarandıqda ahıl şəxslər icbari tibbi sığorta çərçivəsində ambulator tibbi müayinə və müalicəyə cəlb olunur, həmçinin müxtəlif reabilitasiya xidmətlərindən yararlanırlar.
Açıqlamada qeyd edilib ki, mövcud qanunvericiliyə əsasən sosial xidmət müəssisələrinin həkim heyəti tərəfindən sakinlərə ilkin tibbi yardım göstərilir, ehtiyac olduğu halda isə şəxslərin müalicə-profilaktika müəssisələrinə yerləşdirilməsi və ərazi üzrə tibb müəssisələrində ilkin tibbi xidmət alması üçün zəruri tədbirlər görülür.
Ələsgər Ağayevin konkret vəziyyəti ilə bağlı isə Agentlik bildirib ki, onun səhhətinə uyğun tibbi xidmətin sosial xidmət müəssisəsində göstərilməsi hazırda mümkün deyil.
“Hazırda Ələsgər Ağayevə səhhətinə uyğun tibbi xidmətin göstərilməsi sosial xidmət müəssisəsində mümkün olmadığından onun müalicəsinin tibb müəssisəsində davam etdirilməsi zəruridir”, – deyə açıqlamada bildirilib.
Agentlik əlavə edib ki, Ələsgər Ağayevin sağlamlığının qorunması və zəruri tibbi xidmətlərlə təmin olunması istiqamətində qanunvericiliyə uyğun tədbirlər görülür.
***
“Qocalar evi”nin sakini Ağayev Ələsgər Abdullah oğlu tibbi yardım ala bilmədiyini iddia edir.
O, ürəkdöyünmə və halsızlıq şikayətləri ilə həkimə müraciət etdiyini, müayinələr zamanı ürək qapağında problem və qan analizində hemoqlobinin ciddi şəkildə aşağı olduğu müəyyənləşdirildiyini bildirib.
Onun sözlərinə görə, sonradan mədəsində daxili qanaxma və ciddi xora aşkarlanıb. Həkimlər əvvəlcə mədə qanaxmasının müalicə edilməli olduğunu bildiriblər. Ona 10 günlük müalicə, o cümlədən gündə iki dəfə vena daxili damcı təyin edilib.
Ağayev Ələsgər Abdullah oğlu hazırda “Qocalar evi”ndə qaldığını və 4 gündür mədə qanaxmasından əziyyət çəkdiyini deyir. Onun iddiasına görə, müəssisədə həkim və tibb bacıları olmasına baxmayaraq, lazımi tibbi yardım göstərilmir.
Şikayətçi bildirir ki, tibb personalı bəzi müalicələri həyata keçirmək üçün lazımi səlahiyyət və avadanlıqlarının olmadığını deyib.
O, məsələ ilə bağlı “DOST xidməti”nə və Səhiyyə Nazirliyinə də müraciət etdiyini bildirib. İddiasına görə, “DOST xidməti”ndən Səhiyyə Nazirliyinə müraciət etməsi tövsiyə olunub, nazirlikdən isə “Qocalar evi”nin onların səlahiyyətində olmadığı bildirilib.
Ağayev Ələsgər Abdullah oğlu pensiyasının dərman və müalicə xərclərini qarşılamağa kifayət etmədiyini deyərək aidiyyəti qurumlardan kömək istəyib.
O, yaşlı insanlara qarşı daha humanist münasibət göstərilməsini və tibbi yardımın təmin olunmasını xahiş edib.