Məktəbin həyətində infarkt keçirən Eşqin ölümündən əvvəl bərk qorxubmuş - VİDEO
Qorxu keçirən 17 yaşlı gənc bir il əvvəl bitirdiyi məktəbin qarşısındakı həyətdə vəfat edib.
Hadisə dünən axşam saatlarında paytaxtın Sabunçu rayonu, Bakıxanov qəsəbəsində yerləşən 94 nömrəli məktəbin qarşısında baş verib.
17 yaşlı Eşqin Məhi oğlu Rüstəmov yaxın dostlarının əhatəsində dünyasını dəyişib. Məlumata görə, onun ayağının altına atılan pirotexniki vasitə partlayıb və yeniyetmə bu səbəbdən kəskin həyəcan keçirib.
Hadisə anında Eşqin Rüstəmovun yanında olan həmyaşıdları da partlayışdan sonra onun ciddi təşviş yaşadığını bildiriblər.
Hadisə şahidlərindən Fidan Hüseynovanın sözlərinə görə, təcili tibbi yardım ilkin yardım göstərdikdən sonra ərazidən uzaqlaşıb, lakin daha sonra Eşqinin səhhəti yenidən pisləşib.
Mərhumun qonşuları qeyd ediblər ki, Eşqin Rüstəmovun ailəsi əslən Cəbrayıl rayonundandır. O, ailənin tək oğlu olub və bir bacısı var.
