Ermənistan Rusiyadan uzaqlaşır? – Ekspertdən diqqətçəkən şərh

Siyasi şərhçi Turan Rzayev hesab edir ki, Ermənistan Baş naziri Nikol Pashinyanın Rusiyada keçiriləcək 9 May tədbirlərinə qatılmamaq qərarı yalnız seçki kampaniyası ilə bağlı deyil.

News365.az-a açıqlamasında ekspert bildirib ki, Paşinyanın bu addımı ilk növbədə Moskva ilə münasibətlərdə artan siyasi məsafənin göstəricisidir. Onun sözlərinə görə, son illərdə regionda baş verən proseslər, xüsusilə Qarabağ münaqişəsindən sonra yaranmış yeni reallıq Ermənistanın Rusiya təhlükəsizlik sisteminə münasibətini dəyişib.

Turan Rzayev qeyd edib ki, İrəvan artıq KTMT və Rusiyanın təhlükəsizlik təminatlarına əvvəlki qədər etibar etmir. Bu baxımdan, 9 May paradı kimi simvolik tədbirdə iştirak Ermənistan hakimiyyəti üçün Moskva ilə tam siyasi yaxınlıq görüntüsü yarada bilərdi.

Ekspertin fikrincə, qərarın digər səbəbi Ermənistan daxilində Rusiya ilə münasibətlərə dair yaranmış fikir ayrılığıdır. O bildirib ki, cəmiyyətin bir hissəsi Moskvanı əsas tərəfdaş hesab etsə də, digər qrup Rusiyanın Ermənistanın daxili və xarici siyasətinə təsirindən narazıdır. Paşinyan isə bu addımla daha çox ikinci elektorata mesaj verməyə çalışır.

Siyasi şərhçi əlavə edib ki, son illər Ermənistan-Rusiya münasibətlərində etimadsızlıq daha da dərinləşib. Xüsusilə təhlükəsizlik məsələləri, silah tədarükü və regional böhranlar zamanı Moskvanın mövqeyi İrəvanda narazılıq doğurub. Onun sözlərinə görə, Paşinyanın parada qatılmaması həmin narazılığın diplomatik formada ifadəsidir.

Turan Rzayev vurğulayıb ki, Ermənistan hazırda daha çox çoxvektorlu xarici siyasət modelinə keçməyə çalışır və European Union, eləcə də ABŞ ilə münasibətləri genişləndirməyə üstünlük verir. Bu səbəbdən Moskvanın əsas hərbi-siyasi simvollarından biri sayılan Qələbə paradında iştirak İrəvanın yeni siyasi kursu ilə uyğun gəlmir.