Dilimlənmiş çörəklə bağlı gözlənilməz faktlar

Mağazalarda hazır dilimlənmiş şəkildə satılan çörəklər rahatlığı ilə seçilsə də, mütəxəssislər bu məhsulların bəzi mənfi tərəflərinə diqqət çəkirlər.

News365.az xəbər verir ki, mətbəxdə vaxta qənaət etməsi və istifadəsinin rahat olması səbəbindən bir çox insan dilimlənmiş çörəyə üstünlük verir. Lakin görünən rahatlığın arxasında həm keyfiyyət, həm də saxlanma ilə bağlı müəyyən risklər dayanır.

Mütəxəssislərin fikrincə, əvvəlcədən doğranmış çörəklər bütöv çörəklərlə müqayisədə daha tez quruyur. Bunun əsas səbəbi dilimlərin hava ilə daha çox təmasda olmasıdır. Nəticədə məhsul qısa müddətdə yumşaqlığını və təzə görünüşünü itirir.

Digər diqqət çəkən məqam isə istehsal prosesidir. Çörəklər xüsusi avadanlıqlarla doğrandığı üçün gigiyena qaydalarına tam əməl olunmadıqda müxtəlif qırıntıların və ya mikroçirklərin məhsula keçmə ehtimalı artır.

Bundan əlavə, uzun müddət təzə qalmasını təmin etmək məqsədilə bəzi istehsalçılar dilimlənmiş çörəklərə konservant və stabilizatorlar əlavə edə bilirlər. Bu maddələr məhsulun xarici görnüşünü qorusa da, hər zaman ən sağlam seçim hesab olunmur.

Ekspertlər bildirirlər ki, qablaşdırılmış və doğranmış çörəkdə məhsulun həqiqətən təzə olub-olmadığını müəyyən etmək də çətinləşir. Çünki alıcı çörəyin qabığını, iç quruluşunu və bişmə səviyyəsini tam qiymətləndirə bilmir.

Bu səbəbdən mütəxəssislər imkan olduqda bütöv çörəyə üstünlük verməyi daha məqsədəuyğun hesab edirlər.

News365.az