Deputatdan Elm və Təhsil Nazirliyinə İRAD: Mən bu layihənin perspektivini görmürəm

2026-2027-ci tədris ilində yeni təmayül tədris modeli Bakı şəhərindəki 31 ümumi təhsil müəssisəsini əhatə edəcək. 

Paytaxt üzrə 313, 136, 71, 88, 182, 290, 106, 116, 337, 96, 239, 26, 320, 114, 263, 194, 253, 21, 283, 196, 45, 19, 227, 135, 302, 104, 51, 144, 262 nömrəli tam orta məktəblər, həmçinin 70 və 299 nömrəli məktəb-liseydə yeni təmayül tədris modelinin tətbiqinə başlanılacaq.
Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən tam orta ümumtəhsil müəssisələrində X-XI siniflər üçün nəzərdə tutulan yeni təmayül tədris modelinə şagird və müəllimlərin qeydiyyat prosesi davam edir.
 Yeni təmayül tədris modeli tam orta təhsil səviyyəsində məktəbin akademik rolunun gücləndirilməsinə, şagirdlərin ali təhsilə hazırlıq prosesinin məktəb daxilində daha səmərəli təşkilinə xidmət edir.

Qeydiyyat prosesində BŞTİ-nin tabeliyində fəaliyyət göstərən tam orta ümumtəhsil müəssisələrinin X və XI sinif şagirdləri iştirak edə bilərlər. Tədris prosesinin keyfiyyətinin yüksəldilməsi məqsədilə qabaqcıl pedaqoji təcrübəyə malik müəllimlər də yeni təmayül tədris modelinə cəlb olunurlar.
Seçim zamanı peşəkarlıq, pedaqoji fəaliyyət göstəriciləri və tədrisin keyfiyyətinə təsir edən digər meyarlar nəzərə alınır.
Yeni təmayül tədris modelində iştirak etmək istəyən şagird və müəllimlər elektron sistem vasitəsilə müraciət edə bilərlər.

Bu layihə nə qədər perspektivlidir?

Bəri başdan deyək ki, bu ideya heç də mütərəqqi və effektiv deyil.

Birincisi, ona görə ki, bu qərar orta məktəbin ümumi fəlsəfəsini, qayəsini şübhə altına alır. Axı, orta məktəbin vəzifəsi təkcə ali məktəblərə abituriyent hazırlamaq deyil. Məktəb ilk öncə səmiyyətə sağlam vətəndaşlar hazırlayır. Və bütün layiqli vətəndaşların da ali təhsil alması kimi bir öhdəlik də yoxdur.

Bundan əlavə, ancaq Bakı məktəblərində oxuyan şagirdlər üçün xüsusi bir imtiyaz yaratmaq və onların valideynlərini izafi xərclərdən azad eləmək regionlarda yaşayan valideynlərə, şagirdlərə qarşı hörmətsizlik və ayrıseşkilik deyilmi?

Bundan əlavə, seçilmiş məktəblərə qəbulun texniki əsaslandırması yoxdur. Bilinmir ki, adı çəkilən məktəblər X-XI sinifə növbəti tədris ilindən nə qədər şagird qəbul olunacaq? Yeni şagird qəbulu üçün məktəbin texniki imkanları varmı?

Həmin məktəbdə oxuyan və ali təhsil almaq istəməyən şagirdlərin taleyi necə olacaq?

Bu imtiyaz niyə ancaq Bakı sakinlərinə verilir? Bəs, bölgələrdə ali təhsil almaq istəyənlərə bu psixoloji basqı deyilmi?

Təbii ki, yeni qərarla bağlı açıq suallar var. Amma reallıq odur ki, adı çəkilən məktəblərə yeni şagird və müəllim qəbulu ilə bağlı proses başlayıb.

Bu da cəmiyyətdə birmənalı qarşılanmayıb.

Mövzu ilə bağlı fikirlərini News365.az ilə bölüşən Millət vəkili Ceyhun Məmmədov hesab edir ki, təhsil sahəsində atılan istənilən addım ən azı Beynəlxalq təcrübəyə əsaslanmalıdır:

“Təəssüf ki, bu sahədə bizdə Beynəlxalq təcrübə əksər hallarda nəzərə alınmır.Və təsadüfi deyil ki, Elm və Təhsil Nazirliyi yeni bir yanaşma ortaya qoyub. Görünür burada əsas hədəflərdən biri repetitorluğun qarşısını almaqdır. Bəri başdan deyim ki, bu yanaşmanın o qədər də uğurlu olacağını düşünmürəm. Bu layihənin həyata keçirilməsi çox ciddi suallar doğurur. Mən öncədən bu layihəyə uğurlar arzulayıram.Amma bu layihənin perspektivini mən görmürəm.  Çünki bu heç bir Beynəlxalq təcrübəyə əsaslanmayan, ciddi təhlil olunmayan bir yanaşmadır.Eyni zamanda, bu təhsil sektorunda ayrıseçkiliyə aparıb çıxara biləcək bir məsələdir. Sual oluna bilər ki, nə üçün sertifikatlaşmada yüksək bal toplayan müəllimlər xüsusi təmayüllü məktəblərdə tam ştatla fəaliyyət göstərməlidirlər?”

Müsahibimiz hesab edir ki, yeni yanaşma ciddi bir keyfiyyət fərqi yaratmayacaq:

“Çünki bir rayonda 150-200 min əhali varsa, bu layihə ilə heç də onların hamısını əhatə etmək mümkün deyil. 300-500 şagirdi yığdınız bir məktəbə, bəs qalanların taleyi necə olacaq? Yüksək nəticə göstərə biləcək şagirdlərin də təmayül məktəblərinə cəmləşməsi düşünmürəm ki, müsbət nəticələrə gətirib çıxartsın. Bu layihə sanki universitetlərdə yaradılan “Sabah” qruplarının orta məktəb versiyasıdır. Yəqin ki, bir neçə ildən sonra bu layihənin hansı istiqamətdə getdiyini daha aydın görəcəyik. Mən bilmirəm ki, bu kimin düşüncəsinin məhsuludur. Amma yanlış bir metodologiyadır. Və bu təhsildə ayrıseçkiliyin yeni bir göstəricisidir”.

Bir çiçəklə yaz olmaz...

Millət vəkili bidirib ki, bir neçə məktəbdə təhsilin keyfiyyətini yüksəltməklə ümumi təhsilin səviyyəsini qaldırmaq olmaz:

“Lənkəranda bir məktəbdə yüksək nəticələr qazanmaq olar. Amma bununla Lənkəranda bütün təhsilin səviyyəsi  yüksəlməyəcək. Ona görə də məsələyə kompleks yanaşma olmalıdır.Bir məktəbi önə çıxartmaqla digər məktəbləri basqı altında qoymaq olmaz. Və bütün valideynlərin imkanı yoxdur ki, uşaqlarını təmayül məktəblərinə qoysun. Buna heç məktəbin də texniki imkanı çatmaz. Ona görə də bu məsələ üzərində ciddi düşünülməlidir. Şəxsən mən düşünürəm ki, bir neçə təmayül məktəb yaratmaqla ümumi məqsədimizə nail ola bilmərik. Biz bütün məktəblərdə təhsilin keyfiyyətini artırmalıyıq. Ən əsası təhsili əlçatan və keyfiyyətli etməliyik. O zaman, istədiyimizə nail ola bilərik. Amma indiki vəziyyətdə bu qərarı tələsik qəbul edilmiş bir qərar hesab edirəm”.

News365.az