Bakıda diplomatik mesaj: Konqo Belçikadan müstəmləkəçilik ədalətsizliklərinin tanınmasını tələb edir
Konqo Demokratik Respublikası (KDR) Belçikanın müstəmləkəçilik dövründə törətdiyi ədalətsizliklərin rəsmi şəkildə tanınmasını tələb edir. Bu bəyanatla KDR Milli Assambleyasının üzvü Fransis Şibalabala Mukunay Bakıda keçirilən beynəlxalq konfransda çıxış edib.
Bakı Təşəbbüs Qrupunun təşkilatçılığı ilə baş tutan “Belçika müstəmləkəçiliyinin ədalətsizlikləri və təzminat uğrunda 101 illik mübarizə” mövzusundakı konfransda çıxış edən konqolu deputat kompensasiya məsələsinin təkcə maddi tərəflə məhdudlaşmamalı olduğunu vurğulayıb:
Tarixi ədalətsizliklərin tanınması: “Təzminat yalnız maliyyə kompensasiyası ilə bitməməlidir. İlk növbədə, törədilmiş ədalətsizlikləri etiraf etmək, onların fəsadlarını aradan qaldırmaq və belə halların gələcəkdə təkrarlanmayacağına təminat vermək vacibdir”, — deyə Mukunay bildirib.
Yeni münasibətlər modeli: Deputat qeyd edib ki, təzminat prosesi Belçika və KDR arasında keçmişin ağır yükündən azad, bərabərlik və qarşılıqlı hörmətə əsaslanan yeni münasibətlərə yol açmalıdır.
Tarixlə üzləşmə: Mukunay vurğulayıb ki, Konqo xalqı tarixin silinməsini deyil, olduğu kimi qəbul edilməsini və tədris olunmasını istəyir. Üzləşməkdən imtina edilən tarix xalqlararası münasibətlərə hər zaman mənfi təsir edəcək.
Mədəni irsin və arxivlərin qaytarılması: KDR təmsilçisi əlavə edib ki, təzminat prosesinə incəsənət əsərlərinin, mədəni sərvətlərin, arxivlərin və insan qalıqlarının öz mənşə ölkələrinə qaytarılması da daxil edilməlidir.
