Misirdə insan qurbanları ilə bağlı yeni sübutlar tapılıb

Qədim Misirdə hökmdarlarla birlikdə insanların da dəfn edildiyinə dair yeni sübut tapılıb.

News365.az xəbər verir ki, alimlər qədim Misirdə hökmdarların ölümündən sonra onların xidmətçilərinin qurban edilərək dəfn olunması ilə bağlı yeni sübutlar əldə ediblər.

Araşdırma Misirin Umm əl-Qaab bölgəsindəki qədim kral məzarlığında aşkar edilmiş insan qalıqları üzərində aparılıb. Ərazi Misirin ilk sülalələri dövrünə, yəni Böyük Piramidanın inşasından 500 ildən çox əvvələ aid edilir.

Əvvəlki araşdırmalarda çoxsaylı insanların hökmdarların məzarlarının ətrafında eyni vaxtda dəfn edilməsi diqqət çəkib. Lakin onların necə öldüyü uzun müddət məlum olmayıb. Yeni məhkəmə-tibbi araşdırma zamanı bəzi kəllələrdə ölümə səbəb ola biləcək ciddi travmalar müəyyən edilib.

Tədqiqatçılar bunun qədim Misirdə “xidmətçi qurbanı” kimi tanınan praktikaya dair mühüm sübut ola biləcəyini bildirirlər. Bu nəzəriyyəyə əsasən, hökmdar öldükdən sonra ona axirətdə xidmət etmək üçün bəzi şəxslər də öldürülərək onunla birlikdə dəfn edilirdi.