Tünd çay və qəhvə sevənlərin DİQQƏTİNƏ

Diş saralması adətən siqaret istifadəsinə bağlı olaraq dişlərin rənginin dəyişməsi və sarımtıl tona çevrilməsidir. Siqaretlə yanaşı, diş travması, zəif ağız gigiyenası və tünd rəngli qida və içkilərin tez-tez istifadəsi də bu halın əsas səbəbləri arasındadır. Bəzi dərmanlar, genetik faktorlar və yaşlanma da diş saralmasının yaranmasına təsir edə bilər.

Diş saralmasının əsas səbəblərini təqdim edirik:

Diş saralması diş minasının səthində ləkələrin əmələ gəlməsi və zamanla bu qatın nazikləşməsi ilə əlaqəlidir. Siqaret istifadəsi burada əsas amildir. Bununla yanaşı, aşağıdakı xarici və daxili faktorlar da rol oynayır:

Xarici səbəblər:

Siqaret istifadəsi

Zəif ağız gigiyenası

Tünd rəngli qida və içkilər (çay, qəhvə, kola və s.)

Uşaqlıqda yüksək miqdarda flüor istifadəsi

Daxili səbəblər:

Yaşlanma

Genetik meyillilik

Diş travmaları

Diş və diş əti xəstəlikləri

Müəyyən dərmanlar

Siqaret və tütün məhsulları:

Siqaret diş minasına zərər verərək saralma prosesini sürətləndirir və digər diş xəstəliklərinə də zəmin yaradır.
 
Zəif ağız gigiyenası:

Daimi diş təmizliyi edilmədikdə dişlərdə kir, lövhə və ləkələr toplanaraq saralmanı artırır.

Tünd rəngli qidalar və içkilər:

Qəhvə, çay, tünd giləmeyvələr və bəzi ədviyyatlar diş minasında ləkə yarada bilər.

Uşaqlıqda flüorun çox istifadəsi:

Flüor diş sağlamlığı üçün vacib olsa da, yüksək miqdarda qəbul edildikdə diş minasında rəng dəyişiklikləri yarada bilər.

Yaş və genetika:

Yaş artdıqca mina incəlir və alt qatdakı sarı dentin daha çox görünür. Bəzi insanlarda isə genetik olaraq dişlər daha sarı ola bilər.

Travmalar və xəstəliklər:

Dişlərə alınan zərbələr, sinir və damar sisteminə təsir edərək rəng dəyişikliyinə səbəb ola bilər. Diş çürüməsi və diş əti xəstəlikləri də oxşar təsir göstərir.

Dərman istifadəsi:

Uşaqlıqda istifadə olunan tetrasiklin antibiotikləri və bəzi digər dərmanlar daimi saralmalara səbəb ola bilər.

Diş saralması hansı xəstəliyin əlamətidir?

Diş saralması çox zaman siqaret istifadəsi ilə əlaqələndirilir. Lakin siqaret çəkməyən şəxslərdə də bu hal müşahidə oluna bilər. Səbəblər arasında travmalar, diş xəstəlikləri, genetika və bəzi qidalar ola bilər.

Diş saralması necə aradan qaldırılır?

Diş həkimləri səbəblərə uyğun müxtəlif müalicə üsulları təklif edə bilərlər. Ən çox istifadə edilənlər bunlardır:

Dişlərin ağardılması:

Hidrojen peroksid və ya karbamid peroksid ilə aparılan bu prosedur səthi ləkələri aradan qaldırmaq üçün effektivdir. Bəzi ağardıcı vasitələr daxili ləkələrə də təsir göstərə bilər.

Diş bağlama (bonding):

Ağartma ilə keçməyən saralmalar üçün istifadə olunur. Diş rəngindəki kompozit material saralmış sahənin üzərinə çəkilir.

Porselen örtüklər:

Əgər uzunmüddətli saralma mövcuddursa və ağardıcı müalicə kömək etmirsə, porselen örtüklər tətbiq oluna bilər. Bu nazik, lakin dayanıqlı örtüklər dişin üzərinə yapışdırılır.
 
Diş tacları (kronlar):

Əgər diş həm saralıb, həm də zəifləmişsə və ya çürümüşsə, diş həkimi tac qoyulmasını tövsiyə edə bilər.

Diş saralmasının qarşısını almaq üçün aşağıdakı tədbirlərə əməl etmək vacibdir:

Siqareti tərgitmək

Ağız gigiyenasına ciddi əməl etmək

Tünd rəngli qidalardan uzaq durmaq

Diş həkiminə mütəmadi olaraq müraciət etmək

Kifayət qədər su içmək

Sağlam və balanslı qidalanmaq