Qanunun keşiyində dayananlar

Dövlət anlayışı yalnız sərhədlərdən, bayraqdan və ya dövlət atributlarından ibarət deyil. Dövləti yaşadan onun qanunları, bu qanunların işləməsini təmin edən institutlar və ən əsası, insanların öz ölkəsində təhlükəsiz yaşadığına olan inamıdır. Bu inam isə təsadüfən yaranmır. Onu gecə-gündüz, bəzən öz həyatını təhlükəyə ataraq qoruyan insanlar var. Onların adı polisdir.

2 İyul – Azərbaycan Polisi Günü yalnız hüquq-mühafizə orqanları əməkdaşlarının peşə bayramı deyil. Bu tarix dövlətə sədaqətin, qanunun aliliyinin və cəmiyyət qarşısında məsuliyyət hissinin təcəssümüdür. Polis forması sadəcə xidməti geyim deyil, vicdanın, cəsarətin və dövlət qarşısında verilmiş anda sədaqətin rəmzidir.

Hər bir insan rahat yatdığı gecələrin qədrini bəlkə də yalnız təhlükə ilə üzləşəndə anlayır. Halbuki həmin rahat gecələrin arxasında küçələrdə keşik çəkən, cinayətkarlığa qarşı mübarizə aparan, fövqəladə hadisələr zamanı insanların köməyinə ilk çatan polis əməkdaşlarının əməyi dayanır. Onların xidməti saatla ölçülmür. Bayram, istirahət günü və ya gecə anlayışı polis üçün nisbi məfhumdur. Çünki təhlükəsizliyin təqvimi olmur.

Azərbaycan polisi müstəqillik tariximizin ən mürəkkəb dövrlərində böyük sınaqlardan keçib. Dövlətçiliyimizin təhdid altında olduğu illərdə polis əməkdaşları ictimai asayişin qorunması, cinayətkar qruplaşmaların zərərsizləşdirilməsi və ölkədə sabitliyin bərpası üçün ağır və şərəfli bir missiya yerinə yetiriblər. Onların bir çoxu bu müqəddəs vəzifəni yerinə yetirərkən şəhid olub. Bu gün onların adları yalnız polis tarixində deyil, Azərbaycan dövlətçiliyinin qəhrəmanlıq salnaməsində yaşayır.

Azərbaycanın ərazi bütövlüyü uğrunda aparılan mübarizədə də polis əməkdaşları ön sıralarda yer alıblar. Həm Birinci Qarabağ müharibəsində, həm də 44 günlük Vətən müharibəsi və sonrakı antiterror tədbirləri zamanı daxili işlər orqanlarının əməkdaşları peşəkarlıq və vətənpərvərlik nümayiş etdirərək dövlətə sədaqətlərini əməlləri ilə sübut ediblər. Bu, polis adının yalnız asayişin deyil, həm də dövlətçilik ideyasının keşiyində dayandığını göstərən ən parlaq nümunələrdən biridir.

Müasir dünyanın çağırışları polis xidmətinə də yeni məsuliyyətlər yükləyir. Kibercinayətkarlıq, transmilli mütəşəkkil cinayətkarlıq, narkotik vasitələrin qanunsuz dövriyyəsi, insan alveri və digər təhlükələr hüquq-mühafizə orqanlarından daha yüksək peşəkarlıq, müasir texnologiyalara yiyələnmə və çevik qərarlar tələb edir. Azərbaycan polisi bu çağırışlara uyğun olaraq daim yenilənir, müasir texniki imkanlardan istifadə edir, vətəndaş məmnuniyyətinin artırılması istiqamətində fəaliyyətini təkmilləşdirir.

Lakin bütün bunlardan daha vacib olan bir məqam var. Polis yalnız qanunu tətbiq edən şəxs deyil, o, dövlətlə vətəndaş arasında etimad körpüsüdür. İnsanlar polisə güvəndikcə qanunun nüfuzu artır, qanunun nüfuzu artdıqca isə dövlət daha da güclənir. Məhz buna görə də polis-vətəndaş münasibətləri qarşılıqlı hörmət və məsuliyyət üzərində qurulmalıdır.

Polis peşəsi bəzən alqış qazanmayan, lakin cəmiyyət üçün əvəzsiz olan peşələrdəndir. Çox zaman onların gördüyü iş yalnız hansısa hadisə baş verəndə yada düşür. Əslində isə polisin ən böyük uğuru cinayətin baş verməsinin qarşısını almaq, insanların təhlükəsiz həyatını təmin etməkdir. Bu xidmət görünməsə də, hər bir ailənin rahatlığında, hər bir uşağın təhlükəsiz böyüməsində, hər bir vətəndaşın sabaha inamında öz əksini tapır.

2 İyul – Polis Günü münasibətilə bütün polis əməkdaşlarını, daxili işlər orqanlarının veteranlarını və onların ailələrini səmimi-qəlbdən təbrik edir, xidməti borclarını yerinə yetirərkən şəhid olmuş qəhrəman polis əməkdaşlarının əziz xatirəsini dərin ehtiramla yad edirik. Onların göstərdiyi fədakarlıq gələcək nəsillər üçün Vətənə sədaqətin, dövlətə xidmətin və insanlıq borcunun ən uca nümunələrindən biri olaraq yaşayacaq.

Çünki dövləti yalnız güclü iqtisadiyyat və müasir texnologiyalar yaşatmır. Dövləti yaşadan həm də ona sədaqətlə xidmət edən insanlardır. Qanunun keşiyində mətin dayanan, cəmiyyətin təhlükəsizliyi naminə gecəsini gündüzünə qatan polis əməkdaşları həmin insanların ön sıralarında dayanırlar. Onların şərəfli xidməti sabit Azərbaycanın bu günü və təhlükəsiz gələcəyi üçün ən mühüm təminatlardan biridir.

News365.az