Marketlərdə qiymətlər dəyişdi: hansı ərzaqlar bahalaşıb, hansılar ucuzlaşıb?

Azərbaycanda ərzaq məhsullarının qiymətlərində yenidən dəyişiklik qeydə alınıb.

News365.az xəbər verir ki, Dövlət Statistika Komitəsinin məlumatına görə, 2026-cı ilin avqustunda qida məhsulları, alkoqollu içkilər və tütün məmulatlarının qiymətləri iyul ayı ilə müqayisədə 0,3 faiz, ötən ilin avqust ayı ilə müqayisədə isə 7,2 faiz artıb.

Ay ərzində bir sıra gündəlik ərzaq məhsullarının qiyməti bahalaşıb. Belə ki, qarabaşaq və yulaf yarması, mal və qoyun əti, təzə balıq, günəbaxan və qarğıdalı yağı, pomidor, soğan, sarımsaq, ağ kələm, göyərti və bəzi mövsümi meyvələrin qiymətində artım qeydə alınıb.

Bununla yanaşı, bəzi məhsulların qiyməti ucuzlaşıb. Makaron məmulatları, kərə yağı, banan, alma, armud, gavalı, qarpız, yemiş, üzüm, qoz, fındıq, xiyar, şirin bibər, badımcan və kartofun qiymətlərində azalma müşahidə olunub.

Ümumilikdə isə 2026-cı ilin yanvar-avqust aylarında Azərbaycanda istehlak qiymətləri ötən ilin eyni dövrü ilə müqayisədə 5,7 faiz yüksəlib. Qida məhsulları, alkoqollu içkilər və tütün məmulatları üzrə artım 6,9 faiz təşkil edib.

Qeyri-qida məhsullarında da qiymət dəyişiklikləri baş verib. Avqust ayında divar kağızı, kərpic, alçı lövhə, elektrik avadanlıqları, şəxsi gigiyena vasitələri və zərgərlik məmulatlarının qiymətləri artıb. Eyni zamanda yay geyimləri, yuyucu və təmizləyici vasitələr, fərdi kompüterlər və planşetlərin qiymətində ucuzlaşma qeydə alınıb.

Beləliklə, marketlərdə qiymətlər üzrə ümumi mənzərə qarışıq olaraq qalır: bəzi məhsullar bahalaşdığı halda, xüsusilə mövsümi meyvə-tərəvəzlərin bir qismində və ayrı-ayrı digər ərzaq məhsullarında ucuzlaşma müşahidə edilir.

Qeyd edək ki, Dövlət Statistika Komitəsi istehlak qiymətlərini ölkə üzrə 58 şəhər və rayonda, ərzaq məhsulları üzrə isə ay ərzində üç dəfə müşahidə edir.