Kəramət Böyükçöl hicab müzakirəsində Azərbaycan maarifçilərini yada saldı
Yazıçı Kəramət Böyükçöl məktəblərdə hicabla bağlı müzakirələrə münasibət bildirib. O, Azərbaycan maarifçilərinin yaradıcılığına diqqət çəkərək onların cəhalətə, mövhumata və dini fanatizmə qarşı mübarizəsini xatırladıb.
Kəramət Böyükçöl bu barədə sosial şəbəkə hesabında paylaşım edib.
Yazıçı qeyd edib ki, insanlar məktəbə təhsil almaq, bilik qazanmaq, dünyanı, cəmiyyəti və özlərini anlamaq üçün gedirlər. Onun sözlərinə görə, təhsil prosesində şagirdlər Mirzə Fətəli Axundov, Mirzə Ələkbər Sabir, Cəlil Məmmədquluzadə, Hüseyn Cavid və Üzeyir Hacıbəyli kimi görkəmli Azərbaycan ziyalılarının irsi ilə tanış olurlar.
Böyükçöl bildirib ki, bu maarifçilər öz yaradıcılıqlarında cəhalətə, mövhumata və xurafata qarşı mübarizə aparıblar.
Yazıçı paylaşımında hicablı müəllimlərin maarifçilərin əsərlərini tədris edərkən onların dini fanatizmə qarşı fikirlərini necə izah etdikləri ilə bağlı sual da ünvanlayıb.
O, xüsusilə Axundovun dini fanatizmə qarşı mübarizəsini, Sabirin mövhumata yönəlmiş satiralarını və Cəlil Məmmədquluzadənin cəhaləti tənqid edən əsərlərini nümunə göstərib.
Kəramət Böyükçölün fikrincə, Azərbaycan maarifçilərinin əsas məqsədlərindən biri insanları qəflətdən oyanmağa, elmə, maarifə və müstəqil düşüncəyə çağırmaq olub.
Yazıçı hesab edir ki, həmin mütəfəkkirlərin əsərlərini öyrənməklə yanaşı, onların tənqid etdiyi düşüncə tərzini yaşatmaq təhsilin mahiyyəti ilə bağlı suallar yaradır.
“Amma onların fikirlərini öyrənə-öyrənə mübarizə apardıqları düşüncə tərzini öz həyatımızda yaşadırıqsa, deməli, məktəbin mahiyyətini hələ anlamamışıq”, – deyə Kəramət Böyükçöl paylaşımında vurğulayıb.
