"Davos Forumu bir-birini o qədər də sevməyən iqtisadi rəqiblərin "mehriban" ortamıdır”- Ekspert

“2025-ci ilin Davos forumunun əvvəlki forumlardan əsas hədəflər baxımdan müəyyən fərqləri vardır. Beləki, əvvəlki forumlarda da süni intellekt, iqlim dəyişikliyi, insan kapitalı və texnoloji yeniliklər kimi mövzular müzakirə olunsa da bu il bu mövzulara daha konkret və strateji yanaşmalar olacaq”.

Bunu News365.az –a söhbətində iqtisadçı ekspert Eldəniz Əmirov deyib. O bildirib ki,  əvvəlki illərdə texnologiyanın inkişafı ümumi müzakirə mövzusu olsa da, bu il süni intellektin cəmiyyət və iqtisadiyyat üzərindəki dərin təsirlərinə daha çox diqqət ayrılması nəzərdə tutulur:

“Həmçinin, İqlim Dəyişikliyi həmişə prioritet mövzulardan biri olsa da, bu il innovativ tərəfdaşlıqlar və yaşıl sənaye sahəsində konkret həllər təklif olunacağı gözlənilir.

Eyni zamanda insan kapitalı ilə bağlı məsələlərdə də fərqliliklər gözlənilir. Məsələn, əvvəlki forumlar daha çox qlobal iqtisadi məsələlərə fokuslanıb, bu il isə insan kapitalına yatırımlar xüsusi prioritet olacaq.

Forumun digər fəqrliliyi yeni iqtisadi modellərlə bağlı olacağı gözlənilir. Belə ki, əvvəlki forumlarda iqtisadi dayanıqlılıq müzakirə edilib, lakin bu dəfə inkişafın qeyri-ənənəvi mənbələrinin araşdırılması ön plandadır.

Göründüyü kimi 2025-ci il forumu mövzuları daha spesifik, praktiki və gələcək üçün həlledici yanaşmalar hesab edilir. Lakin mövzularda və mahiyyətdə olan fərqliliyin real tətbiqinin nə qədər mümkün olacağını və bunun planet üçün hansı faydalarının olacağını demək bir qədər çətindir. Çünki, Davos Forumu həm də bir-birini o qədər də sevməyən iqtisadi rəqiblərin "mehriban" ortamıdır”.

News365.az