Bu ölkədə sosial media ilə bağlı tarixi addım
Avstraliyada bu həftə parlamentə təqdim edilməsi planlaşdırılan qanun layihəsinə əsasən, istifadəçilər sosial media platformalarında alqoritmləri söndürmək imkanına malik ola bilərlər.
News365.az xarici mediaya istinadən xəbər verir ki, ötən il 16 yaşdan aşağı şəxslərin sosial mediadan istifadəsinə dünyada ilk dəfə qadağa qoyulmasına rəhbərlik edən rabitə naziri Anika Uells bildirib ki, rəqəmsal qayğı öhdəliyi ilə bağlı qanunlar indiyədək tabe olmaq məcburiyyətində qalmayan bir sahəyə əsas təhlükəsizlik təminatları gətirəcək.
Uells “Meta”, “Google” və “TikTok” kimi texnologiya şirkətlərinin istifadəçilərə alqoritmləri söndürmək imkanı təqdim etməməsi halında ciddi cərimələrlə üzləşməli olduğunu deyib.
Müxalifət nümayəndələrinin bəziləri təklifi tənqid edib. Liberal Partiyasının lideri Anqus Teylor isə təşəbbüsə “olduqca şübhə ilə” yanaşdığını bildirərək bunun senzura anlamına gələ biləcəyini irəli sürüb.
Uells istifadəçilərin internetdə qarşılarına məzmun çıxaran alqoritmlərdən istifadə edib-etməməsi ilə bağlı seçim mexanizminin müəyyənləşdirilməsi üçün hökumətin mütəxəssislərin rəyinə müraciət edəcəyini bildirib.
Bu yanaşma hökumətin sosial media qadağasında olduğu kimi, mexanizmin bütün təfərrüatlarını tam müəyyənləşdirmədən əvvəl qanunu qəbul etməyə çalışdığını göstərir.
Uells bazar ertəsi “ABC” telekanalına açıqlamasında avstraliyalıların sosial media lentlərində hansı məzmunu görəcəkləri ilə bağlı daha çox seçim imkanına malik olmalarını istədiklərini deyib.
Nazir bildirib ki, bir çox avstraliyalı həm platformalardan istifadə zamanı əldə etdikləri rahatlığa, həm də yaşadıqları ərazidəki yerli müəssisələr haqqında məlumat əldə etməyə imkan verdiyinə görə alqoritmlərə üstünlük verir. Onun sözlərinə görə, bir çox istifadəçi alqoritmlərdən istifadə etməyi seçəcək. Lakin böyük texnologiya şirkətləri ilk növbədə bu seçimi istifadəçilərə təqdim etməli və onların qərarlarına hörmətlə yanaşmalıdır.
Uells vurğulayıb ki, böyük texnologiya şirkətləri toxunulmaz deyil və müştərilərinə əsas təhlükəsizlik standartlarını təmin etməlidirlər.
