Bu adamlar diqqətli olsunlar!

Günəşdə M sinfinə aid güclü partlayış baş verib.
Bu barədə TASS-a Rusiyanın Tətbiqi Geofizika İnstitutundan məlumat verilib.
 "Avqustun 29-da Moskva vaxtı ilə saat 07:16-da (Bakı vaxtı ilə 08:16 - red.) 4203 (N10W88) günəş ləkələri qrupunda rentgen diapazonunda 9 dəqiqə davam edən M1.1 alışması qeydə alınıb", - deyə məlumatda bildirilib.

Rusiyanın Kosmik Tədqiqatlar İnstitutunun və Elmlər Akademiyasının Günəş-Yer Fizikası İnstitutunun Günəş astronomiya laboratoriyasının məlumatına görə, cümə günü hələ də Yerə təsir ehtimalı yüksək olan güclü partlayışların baş vermə riski mövcuddur.

Məsələ ilə bağlı News365.az -a danışan həkim Rasif Bağırov belə gündə bəzi insanların səhhətlərinə qarşı çox diqqətli olmalarını vacib hesab edir: 

“Belə gündə müəyyən xroniki xəstəlik keçirmiş cavan adamlarda baş ağrıları müşahidə olunur və belə hava əsasən 50 yaşdan yuxarı insanların səhhətinə mənfi təsir göstərir.
Məsələn, qanında müəyyən yağların miqdarı yüksək olan, qanında qatılıq olan, bir sözlə qan təzyiqindən əziyyət çəkən insanlara belə hava pis təsir edir.
Bu da özünü baş ağrıları, halsızlıq kimi simptomlarla göstərə bilər. Belə hava hətta hipertoniyadan ciddi əziyyət çəkən insanların ölümünə belə səbəb ola bilər. Ona görə də bu günlərdə 50 yaşından yuxarı və qan təzyiqindən əziyyət çəkən insanlar bir qədər diqqətli olmalıdırlar”.

News365.az