Bölgələrdə həkim çatışmazlığı problemi davam edir
Azərbaycanda terapevt, ginekoloq, radioloq, cərrah, kardioloq və digər dar ixtisaslı həkimlərin bölgələrdə çatışmazlığı illərdir ki, aktual problem olaraq qalır. Hər il yüzlərlə xəstə müayinə və müalicə üçün yaşadığı bölgədən paytaxta üz tutur. Bu vəziyyət həm maddi, həm də vaxt itkisinə səbəb olmaqla yanaşı, bəzən uğursuz müalicələr və ölüm halları ilə nəticələnir.
News365.az xəbər verir ki, problemin həlli istiqamətində TƏBİB tərəfindən müxtəlif dövlət proqramları və layihələr həyata keçirilsə də, bölgələrdə ixtisaslı tibb mütəxəssislərinə olan tələbat hələ də ödənilmir. Maraqlıdır ki, hər il Tibb Universitetini bitirən yüzlərlə məzun həkimlik fəaliyyətinə əsasən paytaxtda və hətta xaricdə başlayır.
Rəsmi Rəqəmlər Nə Göstərir?
Səhiyyə Nazirliyinin məlumatına görə, 2023-cü ilin sonu və 2024-cü ilin əvvəlinə olan statistikaya əsasən, ölkədə ümumilikdə 33 min 645 həkim fəaliyyət göstərir. Onlardan 17 min 92 nəfəri TƏBİB-in tabeliyində olan tibb müəssisələrində çalışır.
Azərbaycan Tibb Universitetinin Tədris Departamenti, Məzunlarla iş şöbəsinin müdiri Şəfəq Cəbrayılova bildirib ki, son beş il ərzində məzunların əmək fəaliyyətinə necə və harada başlamasına dair statistik araşdırma aparılıb. Bu isə həkimlərin bölgələrə yönləndirilməsi və yerləşdirilməsi ilə bağlı problemlərin həll olunmamasına işarə edir.
Səhiyyə Nazirliyi bildirir ki, hər il iki dəfə rezidentura təhsilini uğurla başa vuran həkim-mütəxəssislər üçün təyinat həyata keçirilir. Onlara Səhiyyə Nazirliyi və TƏBİB-in tabeliyindəki tibb müəssisələrində, həmçinin digər dövlət orqanlarının nəzdindəki səhiyyə ocaqlarında vakant yerlər təklif olunur. Qanunvericiliyə əsasən, göndərişlə işə qəbul olunan həkimlər həmin tibb müəssisələrində üç il müddətində işləməlidirlər.
Tibb Universiteti Məzunlarının Son Statistikası
2023-cü il:
• Məzun sayı: 1217 nəfər
• Rezidenturaya qəbul olunanlar: 232 nəfər
• İkinci təhsil alanlar: 35 nəfər
• Xaricdə təhsil alanlar: 5 nəfər
2024-cü il:
• Məzun sayı: 1150 nəfər
• Rezidenturaya qəbul olunanlar: 243 nəfər
• İkinci təhsil alanlar: 54 nəfər
• Xaricdə təhsil alanlar: 224 nəfər
Göründüyü kimi, ölkədə həkim yetişdirilməsi və rezidentura proqramları davam etsə də, bölgələrdə ixtisaslı tibb mütəxəssislərinin çatışmazlığı problemi hələ də həll olunmamış qalır. Bunun əsas səbəbləri arasında məzunların paytaxt və xarici ölkələrdə işləməyə üstünlük verməsi dayanır.
Səhiyyə sistemində mövcud kadr çatışmazlığının aradan qaldırılması üçün bölgələrdə çalışan həkimlər üçün daha cəlbedici iş şəraiti və sosial təminat tədbirləri görülməlidir. Əks halda, illərdir davam edən bu problem həllini tapmaya bilər.
