Tural Abbaslıdan Əli Kərimli açıqlaması: “Əgər AĞ Partiya…”

Xəbər verdiyimiz kimi, Azərbaycan Xalq Cəbhəsinin sədri və Milli Şuranın faktiki lideri sayılan Əli Kərimli günorta saatlarında saxlanılıb. O, Prezident Administrasiyasının keçmiş rəhbəri "Ramiz Mehdiyev işi" ilə əlaqədar məsuliyyətə cəlb olunub və artıq partiya sədrinin evində Dövlət Təhlükəsizliyi Xidmətinin əməkdaşları tərəfindən axtarış da aparılıb.

Əli Kərimlinin "sağ əlləri" sayılan Məmməd İbrahim və Faiq Əmirli də saxlanılıb.

AĞ Partiya başqanı Tural Abbaslı Əli Kərimlinin saxlanılmasına belə reaksiya verib:

"Uzun müddət idi ki, ictimaiyyətdə Prezident Administrasiyasının sabiq rəhbəri Ramiz Mehdiyev ətrafında gedən vətənə xəyanət, hakimiyyəti zorla ələ keçirmə cəhdi ilə bağlı cinayət işinə diqqət çəkilir. Bildiyiniz kimi, Ramiz Mehdiyevə qarşı dövlətə xəyanət və hakimiyyəti zorla ələ keçirmə cəhdi, yəni dövlət çevrilişi maddələri ilə cinayət işi davam edir. Siyasətdən anlayan hər kəs məsələnin təkcə Ramiz Mehdiyevlə bitmədiyini, dövlət çevrilişi cəhdinin mütəşəkkil dəstənin işi olduğunu təxmin edir. Belə bir cəhd varsa, onun iqtisadi, siyasi, güc strukturları və media ayaqlarının olduğu bəllidir. Bu istiqamətlərdə istintaq aparılmalı və günahkarlar müəyyən edilməlidir.

Əli Kərimlinin bu proseslərlə bağlı saxlanıldığı iddia olunur. Kimliyindən asılı olmayaraq, istər müxalifət, istər iqtidar, istərsə də bitərəf olsun, əgər kimsə dövlət çevrilişi cəhdində və ya xəyanətdə iştirak edibsə, qanun qarşısında cavab verməlidir.

Səhəri gün AĞ Partiya rəhbərliyindən də kimsə bu ittihamla saxlanılsa, hər kəs indidən əmin ola bilər ki, mövqeyimiz eyni olacaq.

Hər kəs qanun qarşısında bərabərdir, söhbət dövlətin gələcəyindən və sabitliyindən getdiyi üçün heç kimin xüsusi imtiyazı olmamalıdır. Amma hələlik istintaqın ilkin mərhələdə olduğu bəllidir. Hansı məlumatlar və ya sübutlar əsasında addımlar atıldığı tam məlum deyil. Səbrlə gözləyək". /// musavat