“Dilimizin problemi yoxdur, problem danışığımızdadır” – Əməkdar artistdən sərt iradlar
Əməkdar artist, ADMİU-nun Musiqili teatr aktyoru kafedrasının müdiri Azad Şükürov Azərbaycan dilinin saflığı və danışığındakı problemlərdən danışıb.
News365.az-a açıqlamasında sənətkar ana dilinin milli kimliyi müəyyən edən əsas dəyər olduğunu vurğulayıb:
“Ana dili yalnız ünsiyyət vasitəsi deyil, strateji məsələdir. Milləti millət edən amildir.”
Şükürov son illərdə dil məsələsinə dövlət səviyyəsində verilən diqqəti yüksək qiymətləndirib:
“Prezident İlham Əliyev ‘təmiz Azərbaycan dilinin qoruyucuları bizik’ deyərək hamımıza məsuliyyət qoydu.”
Sənətkar dilin özündə problem olmadığını, əsas çatışmazlığın danışıqda göründüyünü bildirib:
“Musiqili, yumşaq və zəngin bir dilimiz var. Problem danışığımızdadır. Bahalı kostyum, maşın adamın səviyyəsini göstərmir, ağzını açan kimi görünür.”
O, televiziya və efirlərdə dil normalarının pozulmasının ciddi narahatlıq yaratdığını deyib:
“Yanına-yanbuzuna diqqət verib savadsız danışan efir aparıcıları dilimizin anasını ağladır.”
Şükürovun sözlərinə görə, xüsusilə orta məktəbdə nitq mədəniyyətinin tədrisi gücləndirilməli, gənclərin öz fikirlərini ifadə etmə bacarığı genişləndirilməlidir.
