Şimali Koreyanın hipersəs raketi 1000 kilometr məsafədəki HƏDƏFİ VURDU

Şimali Koreya Yapon dənizində 1 min kilometr məsafədə hədəfi vurmuş orta mənzilli strateji hipersəs raketinin buraxılışı ilə təlim keçirib.

Bu barədə Koreya Mərkəzi Teleqraf Agentliyi məlumat yayıb.
 

“Düşmənlərə strateji hücum vasitələrinin etibarlılığını və öldürücü gücünü yorulmadan və dəfələrlə dərk etdirmək üçün məsuliyyətli səylərimizi fasiləsiz davam etdirməliyik”, – deyə təlimləri şəxsən izləyən Şimali Koreya lideri Kim Çen In bildirib.

Agentliyin məlumatına görə, buraxılış oktyabrın 3-də ölkənin şərq hissəsində həyata keçirilib. Raketçilər hipersəs sistemindən istifadə üzrə hazırlıq keçib, eyni zamanda onun etibarlılığı, effektivliyi və mobilliyi yoxlanılıb.

Raket şimal-şərq istiqamətində buraxılıb və KCNA-nın iddiasına görə, 1 min kilometr məsafədə yerləşən müəyyən edilmiş nöqtəni dəqiq vurub.