Saakaşvilini daha bir cəza gözləyir - Bu gün ELAN OLUNACAQ

Martın 17-də Tbilisi şəhər məhkəməsi Gürcüstanın keçmiş prezidenti Mixail Saakaşviliyə sərhədi qanunsuz keçmə işi üzrə hökm çıxaracaq.   

News365.az xəbər verir ki, bu barədə informasiyanı hakim Mixeil Cincholiya yayıb.   

“Hökm martın 17-də saat 11:00-da elan olunacaq”, - deyə o, RİA Novosti-yə bildirib.   

Xatırladaq ki, Saakaşvili 2021-ci il oktyabrın 1-də Ukraynadan qayıdandan sonra Gürcüstanda saxlanılıb. Oradan süd məhsulları daşıyan yük maşınında gizlənərək bərə ilə qayıdıb. Daha sonra hüquq-mühafizə orqanlarının əməkdaşları onu Tbilisidə saxlayıblar.   

Saakaşvilinin adı beş cinayət işində hallanır. Onlardan ikisində eks-prezident qiyabi olaraq altı il, ictimai mənimsəmə işi üzrə isə 9 il müddətinə azadlıqdan məhrum edilib.     

Martın 12-də Tbilisi Şəhər Məhkəməsi Saakaşvilini dövlət vəsaitlərini mənimsəməkdə ittiham edərək 9 il müddətinə azadlıqdan məhrum edib. Yeni cəzadan sonra Saakaşvili 2030-cu ilə qədər cəzasını çəkməli olacaq.    Hazırda Tbilisi Şəhər Məhkəməsi ona qarşı iki işə baxır: biri 2007-ci il noyabrın 7-də etiraz aksiyasının dağıdılması ilə bağlı, digəri isə sərhədi qanunsuz keçmə ilə bağlı.

Sonuncu üçün onu 3 ildən 5 ilə qədər həbs gözləyir.