Pakistanda İmran Xan böhranı - Fövqəladə vəziyyət elan olundu

Pakistan Prezidenti Asif Əli Zərdari federal kabinetin qərarı ilə ölkədə fövqəladə vəziyyət elan edərək həbsdə olan keçmiş Baş nazir İmran Xanın partiyasının idarə etdiyi əyalət hökumətinin fəaliyyətini dayandırıb.

Bu barədə Pakistan Prezidentinin Mətbuat Xidməti məlumat yayıb.

Məlumata görə, qərar Baş nazir Şahbaz Şərif hökuməti ilə İmran Xanın ölkənin şimal-qərbindəki Xeybər Paxtunxva əyalətini idarə edən “Pakistan Ədalət Hərəkatı” (PTI) partiyası arasında gərginliyin pik həddə çatması fonunda verilib. İmran Xanın tərəfdarları günlərdir liderlərinin azad edilməsi tələbi ilə kütləvi aksiyalar keçirir və paytaxt İslamabada yürüş edəcəkləri ilə hədələyirdilər.

Şahbaz Şərifin ofisindən verilən bəyanatda bildirilib ki, əyalət hökuməti radikal silahlılara qarşı mübarizədə acizlik nümayiş etdirib. Ölkə konstitusiyası fövqəladə vəziyyət zamanı mərkəzi hökumətə əyalət idarəçiliyini ələ almaq hüququ versə də, idarəçiliyin dəqiq necə həyata keçiriləcəyi açıqlanmayıb.

İmran Xanın yaxın köməkçisi və PTI sözçüsü Zülfiqar Buxari bu addımı “gülünc və qanunsuz qərar” adlandırıb. O vurğulayıb ki, bu qərar ölkədə daha böyük qan tökülməsinə, sabitliyin pozulmasına və xaosa səbəb olacaq.