Neft yenidən bahalaşacaq?

ABŞ-la İran arasında atəşkəsin elan olunması neftin qiyətinə böyük ölçüdə təsir edib. Belə ki, bir neçə saat ərzində neft 14%-ə yaxın ucuzlaşdı. Və 94 dollara qədər eniş etdi. Yəqin ki, yaxın günlərdə tərəflər arasında istənilən bir sənəd imzalansa, 70-80 dollar koridoruna yerləşəcək.

Mövzu ilə bağlı fikirlərini bölüşən iqtisadçı Eldəniz Əmirov deyir ki, iki həftəlik atəşkəsdən sonra neft dərhal aşağı düşdü:

“Amma bu düşüş real təklif artımına görə yox, bazarın “risk əlavəsini” çıxarmasına görə oldu. Yəni qiymətdə olan müharibə qorxusu bir qədər silindi.

Amma işin texniki tərəfi fərqlidir. Faktiki bazarda vəziyyət hələ də gərgindir. Yaxın Şərqdə logistika zəncirləri tam bərpa olunmayıb, sığorta xərcləri yüksək qalır, bəzi marşrutlarda risk hələ də qiymətə daxildir. Bu faktorlar neftin kəskin ucuzlaşmasının qarşısını saxlayır.

Digər tərəfdən, bu atəşkəs çox qısadır. İki həftəlik razılaşma bazar üçün strateji ola bilməz. Ona görə də böyük fondlar və treyderlər hələ mövqelərini tam dəyişmirlər, sadəcə risklərini azaldırlar. Bu da qiymətin sərt düşüb sonra stabilləşməsinə səbəb olur.

Hazırda ən real ssenari budur ki, qiymətlər 90 dollar ətrafında dalğalansın. Bir qədər də aşağı enə bilər, amma 70–80 dollarlıq zona üçün ya uzunmüddətli siyasi razılaşma, ya da bazara əlavə böyük həcmdə neft girişi lazımdır.

Əlqərəz, bazarlar qulaqlarını şəkləyib, diqqətlə xəbər gözləyir. Əgər atəşkəs pozularsa və ya risk yenidən artsa, qiymətlər çox sürətlə geri qayıda bilər”.

News365.az