İdxalın 31 faiz azalması nə deməkdir?

Xəbər verdiyimiz kimi cari ilin 5 ayında idxalın həcmi azalıb. Baxmayaraq ki, yerli istehsal da artmayıb.

Elə isə idxalın azalması bazara necə təsir edə bilər?

Mövzu ilə bağlı danışan iqtisadçı Natiq Cəfərli deyib ki, hökümət adamları hər publik çıxışlarında ölkəmizdə bizneslə məşğul olaq üçün gözəl şərait yarandığını israrla vurğulayır, inadkarcasına problemləri görmək istəmir:

“Nəticədə iqtisadi aktivlik olub 0%, gəlirlər azalır, inflyasiya isə artır, makro-iqtisadi göstəricilərdə qonşulardan kəskin şəkildə geri qalırıq.

Ölkədə idxal-ixrac əməliyyatlarında inhisarçılıq meyilləri də kəskin artıb – özünüzün elan etdiyiniz rəsmi rəqəmlər bunu göstərir, hətta, rəqəmlər artıq ağı deyib ağlayır, məsələn:

- 2026-cı ilin yanvar-may aylarında ötən ilin eyni dövrü ilə müqaisədə Azərbaycanda xarici ticarət iştirakçılarının sayı hüquqi şəxslər üzrə 101 şəxs azalaraq 8 594-ə, fiziki şəxslər üzrə isə 11 574 şəxs azalaraq 17 373 şəxsə düşüb. Təsəvvür edin ki, 1 ildə 11574 fiziki şəxs xarici ticarətdən çıxıb, bezib, işləyə bilməyib.

- Bu ilin ilk 5 ayında ərzaq məhsullarında inflyasiya, qiymət artımı rəsmi rəqəmlərə görə 6,6%-ə yüksəlib. Əgər normal, beynəlxalq praktikada qəbul edilmiş 30-35 adda gündəlik tələbat malları üzrə inflyasiyanı hesablasaq, keçın ilin eyni dövrü ilə müqaisədə ərzaqda qiymət artımı ikirəqəmli, hardasa, 10-15% arası olacaq.

2026-cı ilin yanvar-may aylarında Azərbaycanın ümumi idxalı ötən ilin eyni dövrü ilə müqayisədə 31,6% azalaraq 6 milyard 818,3 milyon dollar təşkil edib. İdxalın azalmasını bahalaşma, inhisarçılıq və vətəndaşın alıcılıq qabiliyyətinin kəskin düşməsi ilə izah etmək olar. Mənzərə belədir, indi özünüz bilərsiniz... “

News365.az